Kombi që prodhon më shumë se 60% të vaksinave të botës ka një detyrë kolosale përpara
Me një numër rastesh me Covid-19 që ka tejkaluar 10 milion njerëz, India është vendi i dytë në botë i goditur më keq nga pandemia e koronavirusit, duke ndjekur vetëm Shtetet e Bashkuara. Por ai synon të dalë nga kriza në muajt e ardhshëm me një vaksinim masiv – duke mbuluar në fazën e tij të parë pothuajse po aq njerëz sa e gjithë popullsia e SHBA.
Qeveria e Kryeministrit Indian Narendra Modi ka identifikuar 300 milion njerëz për të marrë dozat e para të vaksinave. Grupi përparësor përbëhet nga 30 milion punonjës të kujdesit shëndetësor, policë, ushtarë dhe vullnetarë dhe 270 milion njerëz të pambrojtur – kryesisht qytetarë mbi moshën 50 vjeç dhe 10 milion të tjerë me probleme serioze.
Prodhuesit e tre kandidatëve kryesorë të vaksinave të koronavirusit kanë aplikuar për autorizimin e përdorimit emergjent dhe të gjithë ata kërkojnë dy doza për të siguruar imunitet të mjaftueshëm. Kjo përfaqëson një total prej 600 milion vaksinime, dhe qeveria e Modi dëshiron të përfundojë të gjithë procesin deri në gusht.
Kjo është një ndërmarrje tepër ambicioze, veçanërisht për një vend në zhvillim me infrastrukturë të dobët rurale dhe një sistem joadekuat të shëndetit publik që tashmë po mbërthehet nën presion të jashtëzakonshëm nga koronavirusi.
Por India gjithashtu ka përparësitë e veta. Si një qendër globale për prodhimin e vaksinave, linjat e saj të prodhimit në masë mund të prodhojnë vaksinat e koronavirusit – të zhvilluara nga kompanitë farmaceutike perëndimore ose brenda vendit – më shpejt dhe më lirë se shumica e vendeve të tjera.
Kur bëhet fjalë për procesin aktual të vaksinimit, India tashmë ka një rrjet të gjerë, të vendosur nën Programin e saj Universal të Imunizimit, i cili inokulon rreth 55 milion njerëz në vit. Modi ka sugjeruar gjithashtu që vendi mund të marrë nga përvoja e tij e organizimit të zgjedhjeve më të mëdha demokratike në botë, duke adoptuar një qasje të tërë të shoqërisë që përfshin pjesëmarrjen e shteteve, rretheve, shoqërisë civile, qytetarëve dhe ekspertëve.
“Çdo indian i vetëm që ka nevojë të vaksinohet do të vaksinohet,” tha Sekretari Indian i Shëndetësisë Rajesh Bhushan në një konferencë shtypi në 8 Dhjetor. (CNN)
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.