Komisioneri për zgjerim në Shqipëri – Pas Maqedonisë së Veriut, të Enjten vjen në Tiranë, viziton edhe Durrësin
Komisioneri për Fqinjësinë dhe Zgjerimin, Oliver Varhelyi, viziton këtë javë Maqedoninë e Veriut dhe Shqipërinë, në një tur dy ditor në dy vendet të cilat aspirojnë të marrin statusin e vendit kandidat, që i`u mohua disa muaj më parë.
Komisioni Europian, edhe me drejtimin e ri të Ursula Von der Leyen është në favor të hapjes së negociatave me dy vendet, duke deklaruar disa herë se qasja nuk ka ndryshuar në krahasim me Presidencën Juncker, e as që do t`i shtohen kritere të reja dy vendeve.
Komisioneri për Zgjerim, pas vizitës në Maqedoninë e Veriut ditën e Mërkurë, të Enjten do të vizitojë edhe Tiranën, por edhe Durrësin, në zonat e goditura nga tërmeti i 26 nëntorit.
Në Tiranë, komisioneri do të takohet me Presidentin Meta, Kryeministrin Rama, Kreun e Parlamentit, Gramoz Ruçi, si dhe përfaqësuesit e partive kryesore opozitare.
Pas konferencës me kryeministrin, Oliver Varhelyi do të udhëtojë drejt Durrësit. Mediat europiane bëjnë me dije se, Komisioni Europian do të publikojë një mini-raport për Shqipërinë dhe Maqedoninë e Veriut në muajin Shkurt, ndërkohë që, metodologjia e re për zgjerimin pritet të prezantohet në muajin Mars.
Kjo është vizita e parë e Oliver Varhelyi në Ballkanin Perëndimor që kur mori detyrën, më 1 dhjetor të 2019-ës.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.