Komisioni Europian ka gati metodologjinë e re të zgjerimit. Proces më i besueshëm dhe stimuj të mëdhenj financiarë

Komisioni europian do të prezantojë të mërkurën metodologjinë e re të zgjerimit të Bashkimit Europian.

Zëdhënësja e Komisioni Europian Ana Pisonero në një deklaratë për shtyp u shpreh se ‘qëllimi nuk është të ridizenjohet politika e zgjerimit duke ndryshuar kushtet, por të propozohet një metodë që ta bëjë procesin e negociatave më të besueshëm, duke i dhënë një drejtim politik më të fortë.”

Komisioneri per zgjerimin Oliver Varheyli do te prezantoje metodologjine e detajuar të zgjerimit në Komitetin e politikave te jashtme ne parlamentin europian, e më pas, ky dokument do tu prezantohet vendeve anëtare.

Ndërkohë e famshmja “Financial Times”, e cila ka pasur edhe akses në dokumentacion thekson se ky plan do të mundësojë qëndrime më të qarta rreth asaj çfarë anëtaret e BE-së presin nga kandidatet për anëtarësim, si dhe lidhur me pasojat me të cilat do të ballafaqoheshin shtetet aspiruese në rast të përmbushjes apo mospërmbushjes së kërkesave të parashtruara.

“Financial Times” shton se plani i Komisionit Europian parashikon se ritmi i negociatave do të varet nga zbatimi i reformave në vendet kandidate për anëtarësim, në të cilat në rast ekstrem procesi negociues mund të të vendoset në pritje apo pezullohet, si dhe të ketë hapje përsëri të kapitujve që mund të jenë mbyllur.

Plani gjithashtu ofron edhe stimuj më të mirë financiare për vendet kandidate për punë të suksesshme, përfshirë edhe ndihmën e rritur financiare dhe investimet si dhe integrim më të shpejtë në politikë, tregjet dhe programet e BE-së në fushat ku është arritur progres.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.