Shkarkimi i kreut të AMF – Komisioni i Ekonomisë shqyrton kërkesën e bordit
Komisioni parlamentar i Ekonomisë shqyrtoi kërkesën zyrtare të anëtarëve të Bordit të Autoritetit të Mbikëqyrjes Financiare, ku kërkohet lirimi nga detyra e kreut të Autoritetit, Enkeleda Shehi. Pas dëgjesave të anëtarëve të bordit, të cilat u shoqëruan dhe me debate, Komisioni vendosi të shtyjë për të hënën vendimmarrjen, që më pas i kalon seancës së ardhshme parlamentare.
“Ky komision merr vendim ditën e hëne, ora 10 për miratimin ose jo të vendimit të bordit të Autoritetit të Mbikëqyrjes Financiare. Vendimi do të shoqërohet bashkë me kërkesë-arsyet pse dhe me raportin e komisionin, i cili do të bëhet publik ditën e hëne. Do të ketë pastaj të gjithë bazën materiale për t’iu paraqitur seancës plenare ditën e enjte të javës tjetër”, tha Braçe.
Drejtoresha ekzekutive e AMF-s, Enkeleda Shehi, gjatë seancës dëgjimore në Komisionin e Ekonomisë, u shpreh, se shkarkimi i kërkuar nga bordi është i dirigjuar nga kryetari i këtij bordi në bashkëpunim me kryetarin e Komisionit të Ekonomisë.
“Ky është një vendim i paligjshëm, absurd, i gabuar dhe për më tepër qesharak. Në këtë vendim të bordit nuk ka as një shkelje financiare, as abuzive, as shkelje ligjore nga ana ime. Jemi marrë me muaj me çrregullimet e një bordi që prodhon vetëm sherre dhe tensione të panevojshme. Vetë esenca e kësaj çështje është qesharake. Ju po iu kërkohet të gjykoni, të shkarkoni drejtuesen e institucionit të dytë rregullator të tregut financiar më të rëndësishëm në vend pas Bankës së Shqipërisë, sepse nuk ka firmosur jo në datën 3 por në datën 7 një rregullore që për mua dhe ekspertët ligjorë të AMF dhe jo vetëm është komplet e paligjshme dhe e diskutueshme”, deklaroi Shehi.
Përplasjet mes kreut të AMF dhe anëtarëve të Bordit janë shfaqur në publik që në mesin e vitit të kaluar e kishin të bënin kryesisht me vendimmarrjen e me rekrutimet në institucion.
Violeta Shqalsi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.