Komisioni i Prokurimit – 60% e tenderave me shkelje gjatë vitit 2016

Të paktën 60 për qind e procedurave të tenderimit të ankimuara pranë Komisionit të Prokurimit Publik kanë rezultuar me shkelje, që sipas konstatimit kanë çuar ose në anulim ose në kthim për rishikim.

Të dhënat e vitit 2016 tregojnë se institucionet në disa raste hartojnë kritere diskriminuese karshi operatorëve ekonomikë të interesuar.

Panorama e shifrave zbardh një nga problemet kryesore që ka shfaqur çështja e prokurimit që lidhet direkt me vlerësimet dhe procedurat e gabuara. Por si ndahet ky 60 për qindësh?

Në 11 % të rasteve Komisioni vlerëson janë konstatuar shkelje të procedurave ligjore dhe është vendosur anulimi i procedurës.

Në 41 % të rasteve i është kërkuar autoritetit kontraktor të bëjë rivlerësimin e procedurës për shkak të shkeljeve të konstatuara në vlerësim dhe në procedurë, të pretenduara edhe nga operatorët ekonomikë ankimues.

Në  8 % të rasteve referuar pretendimeve të operatorëve ekonomikë ankimues, janë konstatuar kritere diskriminuese dhe të pambështetura ligjërisht dhe për këtë arsye i është kërkuar autoriteteve kontraktore modifikimi i tyre.

Por cilat janë në fakt institucionet ndaj të cilave ka më shumë ankimime për procedurat e prokurimit.

Në krye të listës qëndron Posta Shqiptare Sh.a me 85 ankesa, vijuar me Drejtorinë e Përgjithshme të Tatimeve me 35 ankesa dhe Ministrinë e Mirëqenies Sociale dhe Rinisë me 33 ankesa.

Institucionet me më shumë ankesa

Nertila Maho/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.