Komisioni i Venecias – Gjonaj: Institucionet e reja të drejtësisë do pastrojnë politikën nga të korruptuarit
Ministrja e Drejtësisë, Etilda Gjonaj priti në një takim të dërguarit e Komisionit të Venecias: Veronika Bilkova, ish-zëvendës presidente e Komisionit të Venecias, Jørgen Steen Sørensen, anëtar i Komisionit të Venecias, James Hamilton, ish anëtar zëvendësues i Komisionit të Venecias; Artemiza-Tatiana Chiska, Sekretariati i Komisionit të Venecias.
Ministrja vlerësoi rolin e Komisionit të Venecias si një partner shumë i rëndësishëm që ka kontribuar dhe bashkëpunuar me efektivitet në shumë procese të rëndësishme për Shqipërinë dhe sidomos për reformën në drejtësi. Gjatë takimit, Gjonaj iu përgjigj interesimit të tyre lidhur me projekt propozimin e Partisë Demokratike për vetingun e politikanëve, duke përmendur ngritjen e institucioneve të reja të drejtësisë, të cilat do të bëjnë pastrimin e politikës nga zyrtarë të inkriminuar apo të korruptuar.
Ministrja e Drejtësisë tha se tashmë është vendosur një standard i ri me ndryshimet kushtetuese të vitit 2016 për reformën në drejtësi, duke ju nënshtruar më parë një procesi konsultimi me konstitucionalistë, ekspertë dhe shoqërinë civile, standard i cili sipas saj, duhet të ruhet në çdo rast të ndryshimeve kushtetuese. Sistemi i ri i drejtësisë, ngritja e institucioneve të SPAK garantojnë ndëshkueshmërinë e zyrtarëve të lartë pasi është një sistem i depolitizuar dhe i pavarur.
Ministrja i informoi anëtarët e Venecias lidhur me ndryshimet e kuadrit ligjor për përjashtimin e të gjithë kompanive duke përfshirë dhe administratorët dhe ortakët, të cilët kanë precedentë penalë, për të përfituar nga fondet publike.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.