Kompania e makinave elektrike rrit çmimet dhe pezullon prodhimin – Mungesa e lëndëve të para dhe Covid-19, faktorët më ndikues

Kompania kineze e makinave elektrike Nio tha gjatë fundjavës se po rrit çmimet dhe po pezullon prodhimin pasi vala e fundit Covid iu shtua sfidave të zinxhirit të furnizimit.

Aksionet e kompanisë të listuara në Hong Kong ranë gati 9% në tregtimin e mëngjesit të së hënës.

Nio njoftoi të dielën se do të rrisë çmimet për tre SUV-të e saj, ES8, ES6 dhe EC6 me 10,000 juanë (1,572 dollarë), duke filluar nga 10 maji. Çmimet për sedanët ET7 dhe ET5 të lançuara së fundmi do të mbeten të njëjta.

Çmimet e lëndëve të para, veçanërisht ato për bateritë, janë rritur “shumë” këtë vit pa prirje rënëse për një periudhë të afërt, tha CEO William Li si pjesë e njoftimit, sipas një përkthimi të deklaratës kineze nga CNBC.

“Fillimisht ne menduam se mund ta duronim atë, por tani me këtë pandemi është edhe më e vështirë të durohet,” tha ai. “Ne nuk kemi alternativë veçse të rrisim çmimet. Ju lutemi të jeni të mirëkuptueshëm.”

Një ditë më parë, të shtunën, Nio tha se pezulloi prodhimin për shkak të kufizimeve të lidhura me Covid në javët e fundit që ndaluan prodhimin në fabrikat e furnitorëve.

“Për shkak të ndikimit të Covid në Changchun dhe Hebei, furnizimi i disa prej pjesëve tona të automjeteve është ndërprerë që nga mesi i marsit,” tha Li. Prodhimi i kompanisë “arriti të mbështetej në inventarin e pjesëve të makinave deri javën e kaluar”.

Ai shtoi se si rezultat i shpërthimeve të fundit të Covid në provincën Shangai dhe Jiangsu, shumë furnizues nuk mund të ofrojnë as pjesë.

Kompania filloi dërgesat e sedanit të saj të parë, ET7, në fund të marsit. Një sedan i dytë, ET5, është vendosur të fillojë dërgesat në shtator.

Rritje të çmimeve në mbarë industrinë

Për sa i përket dërgesave mujore, Nio ka mbetur prapa atyre të rivalëve Xpeng, makinat e të cilëve shiten me një gamë më të ulët çmimesh dhe Li Auto modeli i vetëm i të cilit në treg vjen me një rezervuar karburanti për karikimin e baterisë. Të tre kompanitë dorëzuan më shumë makina në mars se shkurt, pavarësisht sfidave të zinxhirit të furnizimit.

Nio ishte i fundit nga tre bizneset fillestare që rriti çmimet.

Në mars, Xpeng rriti çmimet për makinat e tij me 10,100 juanë në 20,000 juanë, ndërsa Li Auto rriti çmimet me 11,800 juanë. Lëvizjet pasojnë Tesla dhe kompani të tjera të makinave elektrike në vend që kanë rritur çmimet në javët e fundit

Ndërprerjet e lidhura me Covid-in kanë goditur edhe prodhuesit tradicionalë të automjeteve.

Volkswagen tha të enjten fabrikat e tij në Anting në periferi të Shangait dhe Changchun në provincën veriore të Jilin mbetën të mbyllura deri të premten, 8 prill.

Indeksi i çmimeve të prodhimit të Kinës u rrit me 1.1% në mars nga një muaj më parë dhe fitoi 8.3% nga një vit më parë, sipas shifrave zyrtare të publikuara të hënën. Rritja nga viti në vit tejkaloi pritjet për një rritje prej 7.9% të parashikuar nga një sondazh i Reuters.

N.Xh / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.