Kompanitë ajrore në Shqipëri – Blue Panorama rrëmben 28% të pasagjerëve. Ndjekin Ernest dhe Alitalia
Tregu i fluturimeve në Shqipëri po kalon periudhën e tij më të mirë, duke regjistruar mbi 568 mijë pasagjerë në tremujorin e parë të vitit. Kjo rrjedhimisht do të thotë se edhe kompanitë ajrore që operojnë në vend kanë rritje në numrin e klientëve dhe të ardhurave.
Italia është destinacioni kryesor si në hyrje ashtu edhe në dalje për të gjithë udhëtarët në Rinas, çka reflektohet edhe në fluturimet e kryera nga linjat që fluturojnë vetëm drejt qyteteve italiane. Sipas të dhënave nga Autoriteti i Aviacionit Civil, Blue Panorama, Fly Ernest, Alitalia dhe Albawings përbëjnë në total 51% të fluturimeve për linjat e rregullta.
Një pjesë të rëndësishme sipas numrit të fluturimeve të kryera zë edhe Turkish Airlines me fluturime drejt Stambollit, si dhe Adria Airways, e cila kryen fluturime drejt Gjermanisë, Austrisë dhe Belgjikës.
Renditur sipas numrit të pasagjerëve, dominanca e Blue Panorama është edhe më e madhe, duke rrëmbyer 28% të pasagjerëve ose 161,506 mijë udhëtarë. Pas saj ndjek Ernest Airlines me gjysmën e pasagjerëve, 81,600; Alitalia me 50,852 pasagjerë dhe Albawings me 48,003 pasagjerë.
Turkish Airlines numëron për tre muajt e parë të vitit rreth 40 mijë pasagjerë, ndjekur nga Austrian Airlines dhe British Airways me përkatësisht 27 mijë dhe 25 mijë udhëtarë.
Sa i takon dy prej linjave low-cost, Wizz Air dhe Transavia, kjo e fundit kreu fluturime duke nisur nga Mars, duket se interesi i shqiptarëve është në rritje dhe pritet që ato të regjistrojnë një numër më të lartë pasagjerësh gjatë verës, drejt destinacioneve Budapest, Londër, Amsterdam dhe Paris, ndihmuar nga kthimi i emigrantëve në Britaninë e Madhe.
Fluturimet e shpeshta kanë bërë që 2 prej 4 linjave më të përdorura të jenë në krye të listës së anulimeve dhe vonesave. Kompania Ernest dominon me 2 anulime dhe 9 vonesa mbi 2 orë, ndjekur nga Adria Airways me 5 anulime dhe 5 vonesa mbi 2 orë, si dhe Blue Panorama me 6 vonesa mbi 2 orë.
Autoriteti i Aviacionit civil raporton se janë 67 pasagjerë të kompensuar me mbi 200 euro nga këto kompani këtë fillim viti, ndërkohë që njofton se janë vendosur edhe tabelat përkatëse në aeroport që orientojnë qytetarët si të zgjidhin çdo problematikë që kanë me kompanitë ajrore.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.