Kompanitë e huaja, më pak punonjës e xhiro – Shitjet neto ranë në 20,5 % në 2019 nga 30,3% në 2017, trend të kundërt investimet
Në harkun kohor 2017-2019, bizneset e huaja në vend kanë tkurrur numrin e punonjësve por edhe të shitjeve. Sipas të dhënave zyrtare të Institutit të Statistikave, në vitin 2019, ndërmarrjet e huaja dhe të përbashkëta kanë punësuar 16,1 % të punësimit gjithsej nga 15,6 % dhe 18,7 që zinin në vitin 2018 dhe 2017. Shitjet neto të realizuara nga ndërmarrjet e huaja dhe të përbashkëta përbëjnë 20,5 % të shitjeve neto të ndërmarrjeve gjithsej në vitin 2019, ndërsa gjatë 2018 dhe 2017 ky tregues ishte 25,8 % dhe 30,3%.
Ndërkohë që trend tjetër kanë shënuar investimet. Nga raporti I INSTAT mbi “Ndërmarrjet e huaja në Shqipëri” për periudhën 2017-2019 rezulton se përqindja e investimeve të realizuara nga ndërmarrjet e huaja dhe të përbashkëta është 30,0 % e investimeve gjithsej të vitit 2019, ndërsa në vitet 2018 dhe 2017 ishte 25,0 % dhe 30,4%.
Stoku i Investimeve të Huaja Direkte është rritur me 26,2 % në 2019, krahasuar me 2017. Në fund të vitit 2019, vendet e BE-së përbëjnë pjesën më të madhe të Stokut (55,3 %), të dominuara nga Hollanda dhe Italia respektivisht me 15,3 % dhe 9,4 %.
Fluksi i Investimeve të Huaja Direkte është rritur me 5,2 % në 2019, krahasuar me 2018. Për 2019, Italia ka patur rritjen më të madhe me gati 2 herë ndërsa Zvicra rënien më të madhe me 44,6 %, krahasuar me 2018.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.