Kompensimi financiar i pronave me procedurë të përshpejtuar. Sa para iu kursyen buxhetit të shtetit nga 4 vendimet e para?
Ligji i ri për kompensimin financiar të pronarëve parashikon që veç procedurës së zakonshme të aplikohet dhe procedura e përshpejtuar. Ata që kanë një vendim për kompensimin financiar të pronës mund të zgjedhin atë që mund të cilësohet si “korsi përshpejtimi” që nënkupton marrjen e vetëm një pjesë të caktuar të fondit kundrejt heqjes dorë nga një pjesë tjetër.
Agjencia e Trajtimit të Pronave ka njoftuar se me datë 07 shtator 2017 ka përfunduar procesi i shqyrtimit të kërkesave të pronarëve për kompensim financiar me kërkesa të veçanta.
Deri më tani janë pranuar 4 kërkesat e para për kompensim financiar me kërkesë të veçantë.
Por sa ka kursyer buxheti i shtetit vetëm nga 4 vendime?
Referuar njoftimit zyrtar të ATP-së, shuma totale që do të shpërndahet për 4 vendimet është 1 milion e 998 mijë lekë. Për këto aplikime, si rrjedhojë e implementimit të formulës së kompensimit buxhetit të shtetit kursen një shumë prej 14 milion e 990 mijë lekë.
Referuar ligjit, janë disa mundësi për të përfituar kompensim me procedurë të përshpejtuar, pavarësisht vitit të vendimit për kompensim. Për të përfituar kompensim brenda 1 viti, pronari duhet të heqë dorë nga 80% e shumës që përcaktohet vendim dhe të marrë 20 % të saj. Për të përfituar kompensim brenda 3 vitesh, pronari merr 30 % të shumës duke hequr dorë nga 70% e saj ndërsa për kompensim brenda 5 viteve, pronari merr 40% të shumës kundrejt heqjes dorë nga 60% e saj.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.