Kompensimi i pronave, afatet e plotësimit të dosjes për 2384 vendime pa faturë
Jo të gjithë pronarët me vendime të ’95 patën mundësinë të njihen me masën e kompensimit të llogaritur mbi bazën e skemës së re. Gazeta “Panorama” raporton sot se për shkak të mangësive në dosje, për një pjesë prej tyre vlerësimi financiar nuk mund të kryhet. Këto familje kanë afat deri në fillim të muajit nëntor për të depozituar pranë Agjencisë së Trajtimit të Pronave dokumentacionin e nevojshëm. Nëse nuk ndodh, atëherë pronat e tyre do të vlerësohet me çmimin minimal.
Ne muajin maj, ATP-ja publikoi regjistrin me vendimet e ’95. Nga 6838 dosje që datojnë në këtë periudhe, vetëm për 4454 ishte e përcaktuar vlera e kompensimit. Për rastet apo vendimet, të cilat ka qenë e pamundur për shkak të mungesës së dokumentit kadastral të dosjeve apo mos identifikimin harto-grafikisht të kësaj pronë të vendosur për kompensim, Agjencia ka lënë pa vlerësim vendimin përkatës, duke u bërë thirrje të gjithë të interesuarve se brenda 6 muajve nga publikimi i këtij regjistri, çdo pronar ka të drejtë të paraqesë pranë Agjencisë çdo dokument plotësues apo informacion, i cili do të orientojë në kuptimin e ligjit Agjencinë për të pozicionuar pronën dhe realizuar vlerësimin ekonomik përkatës.
Me kalimin e këtij afati, bazuar në legjislacionin në fuqi, Agjencia do të shpallë vlerësimin ekonomik, i cili do të bazohet në zbatimin e dispozitave ligjore përkatëse të ligjit 133/2015 “Për trajtimin e pronës dhe përfundimin e procesit të kompensimit”.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.