Koncesionet/PPP në sport, si ato në shëndetësi. Do të përjashtohen nga tarifa koncesionare! Relacioni: Nxit projektet
Për projektet e koncesionit/partneritetit publik privat në fushën e sportit nuk do të paguhet operatorët nuk do të kenë detyrimin e pagimit të tarifës koncesionare. Ky është një ndër ndryshimet që vjen si rrjedhojë e amendimit të ligjit të koncesioneve të vitit 2013.
Në ligjin e vitit 2013, në nenin 29 të tij parashikohet se “nëse është përcaktuar në studimin e fizibilitetit, koncesionari paguan një kompensim monetar për koncesionin në shumën dhe në mënyrën e përcaktuar në kontratën e koncesionit”.
Por me projektet në fushën e sportit do të ndiqet e njëjta praktikë si me ato të shëndetësisë, ku koncesionarët do të përjashtohen nga ky detyrim.
“Është parashikuar se projektet e koncesionit/PPP të zhvilluara në fushën e sportit do të përjashtohen nga detyrimi për pagesën e tarifës së koncesionit me qëllim nxitjen e projekteve në këtë sektor i cili po has vështirësi në realizimin e projekteve për shkak të leverdisshmërisë së ulët që kanë” argumentohet në relacionin e nismës së depozituar në Kuvend.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.