Koncesioni i Cërrikut në Gjykatë – Ministria u kërkon 4 kompanive të sigurimeve paratë e kontratës
Ndërsa Shoqëria turke Kurum ka nisur zyrtarisht procedurat e falimentit, Ministria e Energjitikës u ka kërkuar katër kompanive të sigurimeve shlyerjen e detyrimeve për koncesionin e Rafinerisë së Cërrikut.
Scan ka zbardhur padinë e ngritur nga Ministria e Energjitikës në Gjykatën Administrative të Tiranës për të detyruar kompanitë të paguajnë shumat përkatëse. Bëhet fjalë për kompanitë “Intersig Vienna Insurance Group”, “Atlantik-Shoqëri Sigurimesh”, “SIGMA INTERALBANIAN Vienna Insurance Group” dhe “Albsig”.
Të katërta këto kompani kanë siguruar në vitin 2013 koncesionin e lidhur ndërmjet Ministrisë se Ekonomisë, Tregtisë dhe Energjitikës dhe shoqërisë “Kurum International” për rehabilitimin e rafinerisë se Cerrikut.
Kontrata koncesionare e nënshkruar në vitin 2013 parashikonte që kompania Kurum të investonte 6.8 miliardë lekë për rivënien në punë të rafinerisë, me 14 impiante teknologjike dhe me kapacitet përpunues 500 mijë tonë naftë në vit.
Qeveria shqiptare do të përfitonte një tarifë prej 4 për qind të naftës së përpunuar dhe koncesioni do të zgjaste 35 vjet. Kontrata duhej të zbatohej brenda 18 muajve, por ajo mbeti peng e problemeve të rënda financiare më të cilat u përball në vijim kompania turke.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.