Koncesioni i Cërrikut në gjyq – Ministria: Intersig, Atlantik, Sigma, Albsig të paguajnë 1.5 mln USD
Pas dështimit të Koncesionit të Rafinerisë së Cërrikut, që ju dha në vitin 2013 shoqërisë Kurum, Ministria e Energjisë u ka kërkuar kompanive Intersig, Atlantik, Sigma dhe Albsig të paguajnë detyrimin e sigurimit të kësaj kontrate.
Scan ka zbardhur padinë e ngritur nga Ministria e Energjetikës në Gjykatën Administrative të Tiranës për të detyruar kompanitë të paguajnë shumat përkatëse. Sipas burimeve zyrtare pranë Ministrisë së Energjisë, shuma që u kërkohet katër kompanive është 150 milionë lekë, afërisht 1.5 milionë dollarë. Në padi kompanive të sigurimeve u kërkohen edhe rreth 8 milionë lekë kamatëvonesa.
Kompanitë Intersig, Atlantik, Sigma dhe Albsig kanë siguruar në vitin 2013 koncesionin e lidhur ndërmjet Ministrisë së Ekonomisë, Tregtisë dhe Energjetikës dhe shoqërisë “Kurum International” për rehabilitimin e rafinerisë se Cërrikut.
Kontrata duhej të zbatohej brenda 18 muajve, por ajo mbeti peng e problemeve të rënda financiare më të cilat u përball në vijim kompania turke, e cila tashmë ka nisur zyrtarisht procesin e falimentit.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.