Koncesioni i karburanteve – Ekspertët: Do rritet çmimi dhe dëmtohet konkurrenca në treg 

Qeveria shqiptare po planifikon të japë me koncesion shërbimin e kolaudimit të pompave të karburanteve, por ekspertët ngrejnë dyshime mbi këtë procedure, ndërsa argumentojnë se privatizimi do të pasohet nga rritjen e çmimit të karburanteve dhe dëmtim të konkurrencës në treg.

Kreu i Shoqatës së Shoqërive Hidrokarbure, Luigj Aliaj që përfaqëson operatorët  në treg thotë se problem janë kriteret për përzgjedhjen e kompanisë fituese, pasi ato nuk do të konkurrojnë mbi bazën e çmimit më të favorshëm për ofrimin e shërbimit, çka iu lë atyre dorë të lirë të vendosin vetë tarifën e shërbimit. Kjo do të thotë se nuk përjashtohet rritja, duke sjellë automatikisht rritje të çmimit të karburantit.

Edhe ish-zëvendësministri i Ekonomisë, Tregtisë dhe Energjitikës, Eno Bozdo kujton se pranë Drejtorisë së Metrologjisë janë bërë investime në bashkëpunim me Bankën Botërore në laboratorë dhe burime njerëzore, çka rrit dyshimin mbi arsyet që kanë detyruar qeverinë të japë këtë shërbim me koncesion.

Në datën 18 shtator, ndërsa  Ministria e Financave dhe Ekonomisë hapi edhe garën e prokurimit publik për dhënin me koncesion të këtij shërbimi, duke ftuar operatorët  ekonomikë të bëhen pjesë e garës, që do të qëndrojë e hapur deri në datën 18 tetor 2018.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.