Koncesioni i TEC-it të Vlorës – MIE s’tërhiqet nga vizita në terren: Është e detyrueshme për garuesit
Ministria e Infrastrukturës dhe Energjisë nuk është tërhequr nga vizita e detyrueshme në terren për të gjithë operatorët ekonomikë, që duan të marrin pjesë në garën për dhënien me koncesion të TEC-it të Vlorës.
Pavarësisht akuzave të bëra nga Partia Demokratike se ky detyrim po përjashton kompanitë e huaja të marrin pjesë në garë për shkak të kohës së shkurtër të organizimit të saj, ministria ka njoftuar se vizita do të organizohet në datën 15 janar, sikurse ishte parashikuar në dokumentet e tenderit. Në një reagim të saj, ministria hodhi poshtë akuzat e PD-së, duke i quajtur si spekulime dhe se kompanitë kanë afat deri në datën 28 shkurt për të dorëzuar ofertën e tyre.
Ndërkaq, sipas njoftimit më të fundit, ky dikaster rikujton faktin se pjesëmarrja në këtë vizitë është e detyrueshme, ndërsa gjatë saj kompaninë do të kenë akses në dhomën e të dhënave elektronike duke nënshkruar një deklarate konfidencialiteti për ruajtjen e këtyre te dhënave, si dhe do te pajisen me certifikatë pjesëmarrje, e detyrueshme për t’u paraqitur si pjesë e ofertës. Gara për dhënien me koncesion të TEC-it të Vlorës u hap në datën 31 dhjetor 2018, ndërsa vlera për rehabilitimit dhe vënin në funksion të tij pritet të jetë rreth 59 mln euro.
Ky TEC ka një kapacitet 97 MW, por si rrjedhojë e një defekti në tubacionin e ujit, që shërben për ftohjen e turbinës ai nuk nuk funksion që prej vitit 2012.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.