Konfindustria: Krijimi i Tregut të Përbashkët të Ballkanit Perëndimor, praktikisht i pamundur në kushtet e sotme ekonomike
“Krijimi i Tregut të Përbashkët të Ballkanit Perëndimor nuk mund të jetë i suksesshëm në kushtet e sotme ekonomike”. Kështu e vlerëson administratori i Përgjithshëm i “Konfindustria Gjergj Buxhuku.
“Konfindustria vlerëson, se nisma e fundit e Bashkimit Europian për krijimin e Tregut te Përbashkët te Ballkanit Perëndimor, qe do te shqyrtohet ne takimin e nivelit të lartë në muajin korrik 2017 në Trieste-Itali, është e vështirë të jetë e suksesshme pa ndërtimin e strategjive të mirëstudiuara mbështetur në kushtet e sotme ekonomike, politike dhe institucionale të ngjashme dhe të ndryshme të secilit vend të Rajonit”, thuhet në njoftimin e Konfindustria.
Sipas Konfindustria-s nisma të ngjashme pararendëse kanë qenë të pasuksesshme.
“P.sh CEFTA/Marrëveshja e Tregtisë së Lirë ndërmjet vendeve të Ballkanit Perëndimor mund të konsiderohet pothuajse e dështuar. CEFTA është një marrëveshje e ideuar dhe mbështetur gjithashtu nga BE dhe ka hyre në fuqi prej me shume se 10 vitesh”.
“Praktikisht i pamundur krijimi i tregut të përbashkët rajonal pa marrjen e një sinjali të qartë kohor, qoftë edhe të përafërt, për anëtarësimin e vendeve përkatëse në BE, shoqëruar me një program ndihme të rëndësishëm investimesh në infrastrukturë, ekonomi dhe krijim institucionesh publike profesionale, që do të kenë parasysh ndryshimet dhe pabarazitë e sotme të ndjeshme ndërmjet vendeve të Rajonit. Konkurrenca në prodhime&sherbime duhet të jetë e barabartë ndërmjet edhe brenda vendeve anëtare të Tregut Rajonal, që sot kanë shkallë të ndryshme zhvillimi ekonomik, infrastrukturorë dhe institucionale”, thuhet në njoftim.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.