Konfiskimi i pasurive të krimit – Dështon seanca në Komisionin e Sigurisë, deputetët kërkojnë titullarët e institucioneve
Mungesa e titullarëve me mandat politik ka sjellë dështimin e seancës së Komisionit Parlamentar të Sigurisë për projektligjin që ndryshon mënyrën si do administrohen pasuritë e sekuestruara e të konfiskuara të krimit të organizuar. Projektligji, parashikon që pasuritë e krimit të bllokohen menjëherë, pa pritur vendimin e gjykatës, ndërkohë që fati i tyre do të përcaktohen nga Agjencia e Administrimit Pasurive të Sekuestruara dhe të Konfiskuara bashkë me një Komitet Ndërinstitucional të ngritur për këtë qëllim.
Megjithëse është kërkuar procedurë e përshpejtuar nga Qeveria, ka dështuar seanca e Komisionit Parlamentar të Sigurisë për projektligjin që ndryshon mënyrën si do administrohen pasuritë e sekuestruara e të konfiskuara të krimit të organizuar. Deputetët e Komisionit kanë qenë të pakënaqur me nivelin e përfaqësimit të dy dikastereve përgjegjëse për ndryshimet ligjore, Ministrinë e Brendshme dhe Agjencinë e Administrimit të Pasurive të Sekuestruara e të Konfiskuara. Sipas deputetëve, dy institucionet duhet të përfaqësoheshin nga titullarë me mandat politik, dhe jo nga Sekretari i Ministrisë me numrin dy të Agjencisë.
Projektligji, shqyrtimi i të cilit ka nisur tashmë nga Kuvendi parashikon që pasuritë e krimit të bllokohen menjëherë, pa pritur vendimin e gjykatës, ndërkohë që fati i tyre do të përcaktohen nga Agjencia e Administrimit Pasurive të Sekuestruara dhe të Konfiskuara bashkë me një Komitet Ndërinstitucional të ngritur për këtë qëllim. Ndryshimet në ligjin për “për administrimin e pasurive të sekuestruara e të konfiskuara”, do të zgjerojnë ndjeshëm kompetencat e Agjencisë si dhe Komitetit ndërinstitucional. Ndërkohë që Agjencisë, e cila do të kalojë nën Ministrinë e Brendshme, i shtohen edhe kompetencat: deri tani administronte vetëm pasuritë anti-mafia, me ligjin e ri edhe te krimit në përgjithësi. Ndryshime pësojnë edhe kompetencat e Komitetit ndërinstitucional, i cili deri tani ka pasur rol këshillimor, tani vendimmarrës.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.