Konkursi për drejtorët e spitaleve, MSH: Jo në gusht, kriteret do i vendosë qeveria e re
Pas kërkesës së kryeministrit Edi Rama për dorëheqjen e drejtorëve të spitaleve, burime pranë Ministrisë së Shëndetësisë bëjnë me dije për TV SCAN se kriteret dhe rregullat që do të ndiqen për përzgjedhjen e drejtorëve të rinj do të vendosen nga qeveria e re, që do të formohet në muajin shtator.
Kriteret dhe rregullat që do të ndiqen për përzgjedhjen e drejtorëve të rinj në spitalet rajonalë dhe bashkiakë do të vendosen nga qeveria e re, që do të formohet në muajin shtator.
Pas kërkesës së kryeministrit Edi Rama për dorëheqjen e tyre, burime pranë Ministrisë së Shëndetësisë bëjnë me dije për TV SCAN se përgjatë muajit gusht nuk do të ketë asnjë garë të hapur për këto pozicione pune.
Të njëjtat burime thanë se ende nuk ka asgjë konkrete për procedurat që do të ndiqen për emërimet e reja, pasi fillimisht po pritet dorëheqja e drejtorëve të institucioneve spitalore.
Pak ditë më parë Rama zhvilloi një takim me këta të fundit, teksa kërkoi live që ata të tërhiqen nga pozicioni që mbajnë. Sipas kryeministrit, shkak i kërkesës është keqmenaxhimi i spitaleve dhe neglizhenca e tyre për zgjidhjen e problemeve të pacientëve.
Gjithashtu, ai paralajmëroi hapjen e një konkursi, përmes të cilit do të përzgjidhen emrat e rinj, teksa ftoi të bëhen pjesë e tyre edhe drejtuesit aktualë, që mendojnë se janë të aftë për atë pozicion pune.
Të njëjtën praktikë, Rama e ndoqi edhe me krerët e hipotekave, por ndryshme nga shëndetësia tashmë Zyra e Regjistrimit të Pasurive të Paluajtshme ka hapur konkursin për drejtuesit e rinj.
Hapja e garës u njoftua nga drejtoresha e Tiranës, Blerina Doracaj, e cila theksoi se procei i përzgjedhjes do të përfundojë në muajin gusht.
Megjithatë, ajo që vlen të theksohet është fakti se ndryshe nga krerët e hipotekave, 2 ditë pas kërkesës së Ramës, asnjë drejtor spitali nuk ka dhënë dorëheqjen.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.