Konstatohen në shkelje të rregullave gjatë qarkullimit rrugor. Policia: 133 masa administrative ndaj drejtuesve të mjeteve
Kanë vijuar gjatë ditëve të fundit në qytetin e Vlorës kontrollet për drejtuesit e mjeteve që nuk zbatojnë rregullat e qarkullimit rrugor.
Konkretisht, policia ka vendosur masa administrative ndaj drejtuesve të mjeteve, si dhe janë ndaluar 4 persona për drejtim mjetesh nën efektin e alkoolit, si dhe pa leje drejtimi.
“Policia Rrugore e Drejtorisë Vendore Vlorë ka vijuar punën lidhur me kontrollet në drejtim të zbatimit me përpikëri të rregullave të qarkullimit rrugor. Gjatë kontrolleve të ushtruara të cilat kanë pasur për qëllim rritjen e sigurisë rrugore, policia ka konstatuar një sërë shkeljesh të rregullave të qarkullimit rrugor prej drejtuesve të mjeteve.
Në këtë kuadër, bazuar në shkeljet e evidentuara, përgjatë këtyre 4 ditëve të fundit janë vendosur rreth 133 masa administrative të ndryshme ndaj drejtuesve të mjeteve, konkretisht për shkelje: Mosvënie rripi sigurimi, përdorimi i aparatit celular duke drejtuar mjetin, parakalime të gabuara, drejtimin e mjeteve nën efektin e pijeve alkoolike etj.
Policia Rrugore e Vlorës kërkon nga shtetasit të cilët drejtojnë mjetet të jenë tepër të kujdesshëm e të vëmendshëm në respektimin dhe zbatimin e rregullave të qarkullimit rrugor, në mënyrë që të mos bëhen burim aksidenti për veten e tyre, si edhe për të tjerët”, thuhet në njoftimin e Policisë së Shtetit.
os.de/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.