Konsultimet për rrugën e Kombit – Shkreli: Jo tarifë zero për banorët, por pagesë të reduktuar
Në kuadër të konsultimeve me komunitetet lokale për reduktimin e tarifës së Rrugës së Kombit, zv.ministri i Infrastrukturës dhe Energjisë Artan Shkreli ka zhvilluar bashkëbisedime me banorë në qytetin e Hasit dhe atë të Kukësit, ku theksoi se kalimi me pagesë është e vetmja mënyrë për ta mirëmbajtur, duke përjashtuar mundësinë e ‘pagesës zero’ për banorët e zonës, një kërkesë e bërë publikisht edhe nga kreu i Komisionit Parlamentar të Ekonomisë, Erion Braçe.
“Idea këtu nuk shtrohet më që ta bëjmë rrugën me Toll apo pa Toll. Rruga pa Toll do të thotë një rrugë që nuk mirëmbahet dhe gjithë ato miliarda që janë harxhuar do shkojnë drejt degradimit. Për të mbaruar kjo rrugë, sipas projekteve fillestare të fizibilitetit, duhen 240 deri 260 milion euro pasi asnjë njeri nuk e ka bërë azhornimin se çfarë ka ndodhur gjatë këtyre viteve të fundit kur rruga natyrisht mund të ketë degraduar në element të rëndësishëm të saj. 260 milion euro që nuk janë. Borxhi që lahet çdo vit i kësaj rruge, principal plus interesa është rreth 40% e krejt taksës së qarkullimit që mblidhet në rang Shqipërie”.
Kryebashkiaku i Hasit Adem Lala tha se qytetarët e kësaj bashkie nuk janë kundër tarifës por kërkojnë që ajo të jetë e përballueshme.
“Banorët që jetojnë në Has nuk janë kundër tarifës por tarifa duhet të jetë e veçantë për ne që e përdorim më shpesh këtë rrugë duke marrë parasysh gjendjen sociale dhe ekonomike që ka zona. Duhet që tarifa të jetë stimuluese për banorët e zonës sonë”, u shpreh ai.
Aktualisht qeveria shqiptare është duke negociuar me kompaninë koncesionare për një formulë preferenciale për komunitetet lokale, ndërkohë që një ditë më parë Shkreli tha se po bëhen matje shtesë për të përcaktuar se kush do të konsiderohet përdorues i shpeshtë i rrugës.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.