Konsultimi për Fiskalizimin, Haxhi: Në janar 2021 pritet të transmetohen në mënyrë elektronike në kohë reale dhe faturat midis bizneseve

Konsultimi publik mbi projektligjin për Fiskalizimin do të vazhdojë deri në fund të muajit gusht. Këtë të enjte, Ministria e Financës dhe Ekonomisë  zhvilloi takimin e radhës me përfaqësues të Teknologjisë së Informacionit.

Në këtë takim ishin të pranishëm Zv/ Ministri i Financës dhe Ekonomisë, Elton Haxhi,  Drejtoresha e Përgjithshme e Tatimeve, Delina Ibrahimaj dhe drejtuesja e Agjencisë Kombëtare e Shoqërisë së Informacionit, Mirlinda Karçanaj.

Zv/ Ministri i Financës dhe Ekonomisë, Elton Haxhi prezantoi ndryshimet që do të sjellë ky projektligj, i cili pritet të çojë sistemin fiskal drejt modernizimit.

“Nga 1 janari 2020 do të fillojë sistemi i ri i monitorimit të faturimit “biznes – konsumator”, ose transaksionet me para në dorë. Në janar të vitit 2021 parashikohet që të transmetohen në mënyrë elektronike në kohë reale edhe faturat midis bizneseve dhe më pas do të kemi një transmetim të tillë edhe për transaksionet midis bizneseve dhe qeverisë, organeve shtetërore” u shpreh Haxhi gjatë fjalës së tij.

Nëpërmjet projektligjit të paraqitur për konsultim pritet që sistemi i faturimit të ndryshojë, duke bërë të mundur transmetimin e të dhënave nga tatimpaguesit në Administratën Tatimore në kohë reale.

Ky takim shërbeu për të paraqitur gjithashtu problematikat e çështjeve me të cilat hasen shoqatat e sektorit të Teknologjisë së Informacionit. Pas takimit të sotëm, më 23 gusht do të zhvillohet takimi i radhës i Këshillit Tatimor.

Jenida Vladi/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.