Kontrata e abonentëve me OSHEE – Operatori: Përditësoni të dhënat ose do u ndërpritet energjia
Operatori i Shpërndarjes së Energjisë Elektrike rikujton abonentët të kryejnë procesin e përditësimit të të dhënave të kontratës së Furnizimit të Energjisë Elektrike, pasi në të kundërt do u ndërpritet energjia elektrike. Për të lehtësuar këtë proces, në faqen online të kompanisë është mundësuar aksesi i menjëhershëm përmes një dritareje të veçantë, që të lejon përditësim e informacionit.
OSHEE sqaron se përditësimi i të dhënave synon identifikimin e klientëve e më konkretisht identiteti i plotë i tyre, adresa e saktë, mënyra si janë të lidhur në rrjet në kuptimin si dhe të dhënat për matësit. Qëllimi i plotësimit të formularit me të dhënat përkatëse, synon saktësimin e të dhënave të klientëve, në mënyrë që të vendoset një marrëdhënie kontraktore e rregullt në shërbim të palëve.
Ndërkohë që, përveç të dhënave të klientit do të evidentohen qartë dhe informacionet mbi objektin që furnizohet me energji elektrike, duke shmangur pasaktësitë e këtyre të dhënave. Procesi pasohet edhe me avantazhe për abonentin, pasi një kontratë me të dhëna të sakta, të plota e të besueshme, e shndërron shërbimin ndaj tij më transparent dhe efecient.
Ndërkaq, OSHEE kujton se plotësimi i të dhënave të kërkuara, përfaqëson një detyrim ligjor, referuar ligjit “Për sektorin e energjisë elektrike”.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.