Kontrata të reja për sigurimin e makinave – AMF: Dëmshpërblim direkt nga kompania nëse dëmtuesi nuk është i siguruar
Ndryshimet e shumta që i janë bërë ligjit të sigurimit të automjeteve do të pasqyrohen edhe në kontratat e reja të sigurimit që drejtuesit do nënshkruajnë me kompanitë. Autoriteti i Mbikëqyrjes Financiare ka hedhur për konsultim public në faqen e vet zyrtare modelet e reja të policave të sigurimit të detyrueshëm. Ndryshime thelbësore do të pësojnë Polica për sigurimin e detyrueshëm të mbajtësve të mjeteve motorike për përgjegjësinë ndaj palëve të treta (TPL); Polica për sigurimin e detyrueshëm nga aksidentet të pasagjerëve në transportin publik; si dhe Polica e sigurimit kufitar.
Policat e reja të sigurimit, të cilat do të miratohen nga Autoriteti, pas procesit të konsultimit publik, reflektojnë disa nga ndryshimet kryesore të Ligjit nr. 32/2021, datë 16.03.2021 “Për sigurimin e detyrueshëm në sektorin e transportit”, si: Përfshirjen e Raportit Evropian të Aksidenteve, formular i cili u shpërndahet të siguruarve së bashku me policën e sigurimit; Mundësinë e të siguruarit për të kërkuar dëmshpërblim direkt nga shoqëria e tij e sigurimit, në rastin kur shkaktari i aksidentit është i pasiguruar apo i paidentifikuar; Afatet e reja për trajtimin e kërkesave për dëmshpërblim; Rritjen e limiteve të përgjegjësisë.
Më herët, Autoriteti i Mbikëqyrjes Financiare hodhi për konsultim public formularin e njohur si “Raporti Evropian i Aksidenteve” i cili do të plotësohet nga drejtuesit e përfshirë në aksidente me vlerë dëmi nën 30 mijë lekë nëse ata gjejnë gjuhën e përbashkët.
Formulari përmban disa kuti të cilat shpjegojnë rrethanat e ndodhjes së aksidentit, si, nëse mjeti ishte në lëvizje, i parkuar, ndërronte korsi, godiste mjetin tjetër, apo lëvizte në mënyrë të gabuar.
Raporti, i nënshkruar nga të dy drejtuesit e mjeteve, nënkupton që ngjarja ka ndodhur sipas rrethanave, modaliteteve dhe pasojave të pasqyruara në formular. “Raporti Evropian i Aksidenteve” i bashkëlidhet kërkesës për dëmshpërblim, e cila trajtohet nga shoqëria e sigurimit. Për dëmet me vlerë mbi 30.000 lekë, drejtuesit e mjeteve duhet patjetër të marrin procesverbalin e konstatimit të shkeljes nga Policia Rrugore.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.