Kontratat futures për Bitcoin – Volum i madh i tregtisë, kontrata për Janarin arrin në $18,700
Kontratat futures të Bitcoin patën rritje me 20% në debutimin e shumëpritur në Shtetet e Bashkuara, për të cilën investitorët mendojnë se do të inkurajojë përdorimin më të gjerë dhe legjitimitetin e valutës, pavarësisht paralajmërimeve për rrezikun e një flluske. Prezantimi i Bitcoin në tregun e kontratave futures, shkaktoi një “bllokim” në faqen e web-it të Bursës më të madhe në botë të kontratave derivate në Chicago, CBOE (Chicago Board Options Exchange).
Kjo erdhi prej trafikut të madh në faqen e web-it të bursës. Kontrata e së ardhmes (Futures) është një marrëveshje që kërkon për njërën nga palët e përfshira të blejë ose të shesë një produkt, në një datë të caktuar në të ardhmen, me një çmim të paracaktuar, me funksion mbrojtjen nga lëvizjet negative të çmimit.
Kontrata 1 mujore e Bitcoin e nisi tregtinë ditën e Shtunë në 15,460 dollarë, duke u ngjitur në 18,700. Gjatë një kohe të shkurtër të tregtimit, pati rritje me 17% me 2,368 kontrata të tregtuara. Deri më tani për vitin, valuta është rritur me 1,400% dhe shtimi në muajt e fundit ka qenë tejet i shpejtë.
Ekspertët ishin shqetësuar se rreziqet e lidhura me valutën do të parandalonin prezantimin e Bitcoin në këtë treg. Sipas tyre, nisja e kontratave futures nuk nënkupton reduktimin e luhatshmërisë së kriptovalutës.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.