Kontroll i cilësisë në shkolla – MASR, në 24 maj test për nxënësit në arsimin para universitar

24 maji është afati i lënë nga Këshilli i Ministrave për zhvillimin e kontrollit të  cilësisë dhe vlerësimit të arritjeve të nxënësve në shkollat e arsimit para universitar.

Udhëzimi i Ministrisë së Arsimit  parashikon vlerësimin e të nxënit te nxënësit çdo vit, në kuadër të  rritjes  së cilësisë  në arsim e cila ka qenë një ndër objektivat e qeverisë dhe reformat e ndërmarra  prej saj. Sipas ministrisë së Arsimit po synohet mbështetja jo vetëm përmes punësimit të  mësuesve në bazë të meritokracisë dhe rritjes së buxhetit për  pagat e tyre, por edhe  kontrolleve për vlerësimin e arritjeve .

Sipas udhëzimit, testit pritet ti nënshtrohen nxënësit e klasave të pesta në mbarë vendin dhe 3 janë lëndët e parashikuara për vlerësimin  e arritjeve, Gjuhë Shqipe, Matematikë dhe Dituri Natyre. Ministria e Arsimit bënë të qarta dhe procedurat të cilat do të ndiqen për  hartimin dhe vlerësimin e testeve të cilat  janë të përcaktuara në rregulloren “Për procedurat e organizimit dhe të zhvillimit të vlerësimit të arritjeve të nxënësve të arsimit fillor 2019”.

Ndërsa nxënësit me aftësi të kufizuara do ta zhvillojnë këtë test në përshtatje me programin mësimor me të cilin punojnë, veçoritë dhe standardin e tyre. Pas  përfundimit  të provimit do të jetë Institucioni Përgjegjës për Sigurimin e Cilësisë në Arsimin Para universitar ai i cili do të monitorojë  procesin e vlerësimit të arritjeve të nxënësve të arsimit fillor dhe më pas të raportojë për çdo parregullsi të vërejtur gjatë zhvillimit të tij.

Nertila Doko/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.