Korrupsion dhe shpërdorim detyre – SHÇBA, masa të rënda ndëshkuese 5 punonjësve të policisë
SHÇBA në bashkëpunim me Prokurorinë e Tiranës bëri me dije se ka ekzekutuar vendimet e Gjykatës së Shkallës së Parë Tiranë për 5 punonjës policie dhe 1 shtetas për veprën e korrupsionit.
Sipas njoftimit, Drejtoria Rajonale e SHÇBA-së Tiranë, në bashkëpunim me Prokurorinë Pranë Gjykatës së Shkallës së Parë Tiranë ka kryer hetime në kuadër të procedimit penal të vitit 2019 regjistruar për veprën penale të “Shpërdorimit të Detyrës” dhe “Korrupsionit pasiv nga persona që ushtrojnë funksione publike”, parashikuar nga nenet 248 dhe 259 të Kodit Penal, në ngarkim të punonjësve të policisë së Komisariatit Rajonal të Policisë Rrugore Tiranë.
Pas grumbullimit të provova dhe hetimit, Gjykata e Shkallës së Parë Tiranë ka vendosur masat e sigurimit në ngarkim të shtetasve: “Arrest me burg” për punonjësin e policisë F.XH., 58 vjeç, nga Tirana. Gjithashtu për një punonjëse tjetër policie me iniciale A.M, 25 vjeçe, nga Tirana, njoftimi bëri me dije se nisur nga rrethanat familjare referuar të dhënave të gjendjes civile, gjykata vendosi caktimin e masës së sigurimit personal “Arrest shtëpiak”. Po ashtu u mor masa “Arrest në shtëpi” për punonjësin e policisë B.A., 48 vjeç, nga Tirana, “Pezullim i ushtrimit të detyrës”, për punonjësin e policisë E.K,. 28 vjeç, nga Tirana, “Pezullim i ushtrimit të detyrës” për punonjësin e policisë F.D., 38 vjeç, nga Tirana dhe “Detyrim për t’u paraqitur në policinë gjyqësore” për shtetasin F. L., 35 vjeç, nga Tirana, i dyshuar për veprën penale të “Korrupsionit aktiv nga persona që ushtrojnë funksione publike”.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.