Korrupsioni, përmirësim i lehtë – Raporti i “TI”, Shqipëria vijon të jetë ndër vendet e fundit në Europë
Mënyra më e mirë për të matur korrupsionin në një vend është pikërisht perceptimi mbi të, dhe “Transparency International” publikon çdo vit raportin më prestigjioz në nivel global sa i përket perceptimit të korrupsionit. Raporti i sapo publikuar për vitin 2020 e rendit Shqipërinë në vendin e 104-ët në botë, me 36 pikë, me një pikëzim nga 0-100, ku 100-ta tregon nivel zero të korrupsionit në një shoqëri të caktuar.
Në raportin e mëparshëm, vendi ynë grumbullonte 35 pikë, duke shënuar një përmirësim të lehtë këtë vit, si dhe renditej në vendin e 106-të. Pavarësisht këtij përmirësimi të lehtë në renditjen që përfshin 180 shtete të ndryshme të globit, Shqipëria vijon të jetë ndër vendet e fundit në Europë sa i përket nivelit të korrupsionit të perceptuar. Vetëm Bosnje Hercegovina, Maqedonia e Veriut, Rusia dhe Ukraina kanë një renditje më të dobët se Shqipëria, thotë “Transparency International”.
Kosova ndërkohë renditet në të njëjtin pozicion, me pikë të barabarta. Rezultatin më të mirë historik, vendi ynë e regjistron në vitin 2016, kur grumbullonte 39 pikë ndër 100 të tilla. Në nivel global, Danimarka vlerësohet si vendi me më pak korrupsion, dhe ndiqet nga Zelanda e Re me Finlandën, ndërkohë që në vend të fundit renditet Sudani Jugor.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.