Korsitë e biçikletave, së shpejti punime të reja në Rr. Dibrës dhe të Kavajës – Ja detajet e planit urbanistik

Bashkia e Tiranës ka nisur sot procedurën e tenderimit edhe për 2 akse të reja të korsive të biçikletave në Tiranë. Bëhet fjalë për segmentin nga Fillimi i rrugës së Dibrës pranë qendrës deri tek Medreseja, si edhe segmentin nga fillimi i rrugës së Kavajës, deri tek kryqëzimi me rrugën Kont Urani.

Për ndërtimin e korsive të dedikuara në rrugën e Kavajës do të përdoret trotuari i mesit i kësaj rruge, në mënyrë të ngjashme me atë që do të ndërtohet në bulevardin ‘Zogu I’.

Korsitë do të shtrihen deri në kryqëzimin me unazën e re, ndërsa Bashkia ka hapur procedurën vetëm për segmentin e parë.

Edhe në rrugën e Dibrës, ky do të jetë një segment i dytë që do t’i shtohet punimeve që po kryhen në segmentin nga ‘Farmacia 10’ deri tek komisariati nr.4. Korsitë e reja me gjerësi 1.5 metra do të vendosen mbi sipërfaqjet e dedikuara për biçikletat në të dyja anët e rrugës, të cilat aktualisht janë thjesht të vijëzuara dhe shërbejnë si xhepa ndalimi për automjetet.

Segmenti rrugor që korrespondon me pjesën ku do të shtrihen korsitë në rrugën e Dibrës është një aks shumë i ngarkuar me trafik automjetesh dhe shtrimi i korsive do të ngushtojë rrugën, duke e bërë edhe më të vështirë ngërçin e veturave.

Megjithatë, në shtimin e korsive të dedikuara për biçikleta, Bashkia e Tiranës mund të themi se po vepron më shumë për nevojat që parashikohet të lindin në të ardhmen, se sa nga ato të së tashmes.

Siç përmendet edhe në planin rregullues TR030, për udhëtimet e shkurtra nën 5 kilometra, janë ecja dhe çiklizmi zgjedhjet e përcaktuara. Ndërsa makina konsiderohet një mjet luksi dhe jo domosdoshmëri.

Aktualisht në kryeqytet, rrjeti i korsive të biçikletave është i përfunduar në pjesët kryesore brenda unazës së vogël dhe gjatë bulevardit të ri, ndërsa janë parashikuar ndërtimi edhe në segmente prioritare siç janë Bulevardi Qendror, Rruga e Dibrës, Rruga e Kavajës dhe Bulevardi Zogu I. Me përfundimin e punimeve në rrugën e Dibrës dhe atë të Kavajës, do të afrohet edhe realizimi i premtimit për lëvizjen e dedikuar të biçikletave në të gjithë linjën Kombinat-Kinostudio.

Nëse i referohemi planit të zhvillimit, ndërhyrje të ngjashme do të ndodhin edhe në Rrugën e Durrësit, Unazën e Tretë dhe përgjatë Lumit të Lanës, ku me shumë gjasa trotuaret buzë këtij lumi do të përdoren vetëm nga biçikletat.

Pas përfundimit të të gjithë rrjetit çiklistik brenda qytetit, Bashkia do të angazhohet më tepër në promovimin e kulturës dhe eventeve të këtij sporti, duke zgjeruar dhe përmirësuar edhe rrjetin ekzistues të bashkëpërdorimit “Ecovolis”.

Angelo Haruni/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.