Kosova detajon Paketën Financiare të Emergjencës! Si ndahen 179.6 milionë euro? Shtesë page për ata që ekspozohen nga puna

Këtë të martë qeveria e Kosovës ka miratuar Pakon Emergjente Fiskale e cila kap një vlerë thuajse 180 milionë euro. Në masat e marra përfshihet dyfishimi i vlerës së skemës sociale për të gjithë përfituesit, për muajin prill dhe maj, ku totali kap vlerën 7.65 milionë euro (përfshirë edhe marsin).

Po ashtu, kjo pako emergjence parashikon 30 euro shtesë në muaj për periudhën prill, maj dhe qershor, për të gjithë përfituesit e skemave sociale dhe pensioneve, të cilët marrin pagesa mujore në vlerë më të ulët se 100 euro. Kjo masë arrin vlerën 13 milionë euro.

Nga ana tjetër, përsa i përket mbështetjes financiare për shoqëritë tregtare është vendosur mbulimi i shpenzimeve të pagave mujore të punonjësve në vlerën 170 euro, për muajin prill dhe maj, masë kjo që kap vlerën 41 milionë euro.

Po ashtu, për prillin dhe majin, subvencioni i qirasë deri në 50% të qirasë, masë kjo deri në 12 milionë euro, si dhe mbulimin e kontributeve të pensioneve po për këto dy muaj, deri në vlerën 8 milionë euro.

Përsa i përket  ndërmarrjeve publike që kanë vështirësi financiare për shkak të situatës së emergjencës së shëndetit publik, ato do të kenë huadhënie me 0% interes, me të drejtë kthimi deri në 31 dhjetor 2020. Kjo masë deri në vlerën deri në 20 milionë euro.

Nga kjo pako emergjente fiskale do të përfitojnë edhe komunat e Kosovës të ndikuara nga pandemia, të cilat do të kenë sigurim mbështetje shtesë financiare, e cila do të arrijë deri në vlerën 10 milionë euro.

Më tej, nga kjo skemë financiare do të përfitojnë paga shtesë punonjësit e ekspozuar ndaj rrezikut, masë që kap vlerën 15 milionë euro.

“Sigurimi i shtesës mbi pagë në vlerë prej treqind 300 euro për punëtorët në terren dhe që janë të ekspozuar drejtpërdrejt rrezikut të infektimit në punën e tyre (jo i gjithë stafi i institucionit): Stafi mjekësor (mjekët dhe infermierët), policët e Policisë së Kosovës, zyrtarët (gardianët) e Shërbimit Korrektues, zyrtarët (zjarrfikësit) e Agjencisë së Menaxhimit të Emergjencave, personeli (ushtarët) i FSK-së, punëtorët që punojnë në Karantinë – Qendra e Studentëve të Prishtinës, zyrtarët (inspektorët) e Inspektoratit të Punës, zyrtarët (inspektorët) e Administratës Tatimore të Kosovës, Zyrtarët (doganierët) e Doganës së Kosovës, zyrtarët (inspektorët) e Inspektoratit të Tregut, zyrtarët (inspektorët) e inspektorateve përkatëse komunale, zyrtarët e Inspektorati të Mjekësisë së Punës, për muajin Prill dhe Maj” shkruhet më tej për punonjësit përfitues.

Qeveria e Kosovës ka miratuar paga shtesë 100 euro për muajin prill dhe maj edhe për punonjësit e dyqaneve ushqimore, furrave dhe farmacive, që gjithashtu po luajnë një rol tejet jetik në këtë situatë të përhapjes së pandemisë COVID – 19, masë e cila kap vlerën 4 milionë euro dhe përfshin muajin prill dhe maj.

Paketa përfshin pagë “asistencë” për prillin, majin dhe qershorin në vlerën 130 euro për të gjithë punonjësit që për shkak të situatës së krijuar, humbasin vendin e tyre të punës. Në total, kjo masë kap vlerën 4 milionë euro.

Nga ana tjetër, qeveria e Kosovës ka vënë në dispozicion 2 milionë euro për të gjitha projektet e rimëkëmbjes dhe iniciativat që synojnë përmirësimin e komuniteve të Kosovës,  të goditura nga pandemia.

Sigurimi i likuiditetit financiar vijon si më poshtë:

• Mikro-ndërmarrjet dhe të vetë-punësuarit nëpërmjet programeve të caktuara të Fondit për Garantimin Kreditor të Kosovës, në shumën dhjetë mijë 10.000 euro për periudhën 24 muajsh, në vlerë deri në pesëmbëdhjetë milionë 15.000,000.00 euro.

• Shoqëritë Tregtare/Kompanitë të autorizuara që ofrojnë shërbime bazike (të ngjashme me ato të ndërmarrjeve publike) me kthim deri më 31.12.2020, në kudër të vlerës së përcaktuar në 1.4. të këtij vendimi.

Pakoja e Emergjencës fiskale mbështet bujqësinë, me 5 milionë euro për grante, subvencione dhe rritje të prodhimit bujqësor, ministrinë e kulturës, me po ashtu 5 milionë euro në aktivitete sportive dhe kulturore. Një tjetër pikë është edhe ajo e tregtisë së jashtme, ku 10 milionë euro do të shkojnë në ndihmë të eksportuesve.

“Mbështetje financiare për shoqëritë tregtare që regjistrojnë punëtorët me kontratë pune së paku një (1) vjeçare gjatë periudhës së situatës së emergjencës së shëndetit publik, nga 130 euro për dy muajt pasues pas regjistrimit, në vlerë deri në 6.000.000 euro; Pagesa e asistencës mujore në vlerë 130 euro për qytetarët me kushte të rënda sociale, të lajmëruar si të papunë në institucionin kompetent, që nuk janë përfitues të asnjë të hyre mujore nga buxheti i Kosovës, për muajin Prill, Maj dhe Qershor, në vlerë deri në tre milionë 3.000.000 euro” shkruhet më tej në paketën fiskale të Kosovës.

Në total, vlera e paketës së emergjencës fiskale në Kosovë kap vlerën 179.6 milionë euro dhe ky vendim obligon gjithashtu të gjitha organizatat buxhetore/institucionet përkatëse për zbatimin e vendimit dhe të vendimeve që do të nxirren nga ministria për zbatimin e tij.

Jenida Vladi/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.