Kosova do të aplikojë në BE dhe në Këshill të Europës!
Krerët e Kosovës thonë se momenti për aplikim në BE dhe KE është i volitshëm. Autoritetet ndërkombëtare thonë se për anëtarësimin e Kosovës në BE, hapi i parë është normalizimi i marrëdhënieve me Serbinë.
Autoritetet e Kosovës e kanë vënë si prioritet aplikimin e Kosovës në mekanizmat ndërkombëtarë dhe synimet janë të qarta: Bashkimi Europian, Këshilli i Europës dhe NATO. Presidentja e Kosovës Vjosa Osmani, në 1 vjetorin e punës së saj si presidente, tha aktualisht po punohet maksimalisht për anëtarësim të Kosovës në Këshill të Europës dhe në NATO. Por sipas saj anëtarësimi në NATO është më i komplikuar e sa i përket Këshillit të Europës, Osmani tha se 2/3 e ministrave që do të votojnë në KE janë nga shtetet që e kanë njohur pavarësinë e Kosovës.
Mbështetjen për qeverinë për aplikim të Kosovës për anëtarësim në Këshill të Europës e bëri edhe partia me e madhe opozitare Partia Demokratike e Kosovës PDK nënkryetarja e së cilës, Vlora Çitaku, thotë se “deri tani kjo nuk ka qenë e mundur për shkak të ndikimit të Rusisë në Këshillin e Europës”. Por me pezullimin e Rusisë nga KE për shkak të agresionit ndaj Ukrainës, “është krijuar një momentum i ri, ku qeveria e Kosovës, mund të nisë procedurën e anëtarësimit në këtë strukturë të rëndësishme”.
Një synim tjetër më madhor e ka kryeministri Albin Kurti, i cili premton që gjatë këtij viti Kosova të aplikojë për anëtarësim në Bashkimin Europian. Për aplikimin në BE, Kurti tha se do ta bëjnë gjatë mbledhjes së Këshillit të Stabilizim-Asocimit.
Sipas tij “Kosova është vend potencial për vendin kandidat dhe i është premtuar perspektiva e anëtarësimit në BE dhe ndaj vendi whstw i përkushtuar të zbatojë pjesën e tij të detyrimeve dhe të intensifikojë bashkëpunimin me shtetet anëtare dhe institucionet e Bashkimit Europian për të avancuar në fazën tjetër të anëtarësimit. Deutsche Welle
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.