Kosova po përballët me një përkeqësim të situatës epidemiologjike!
Ndonëse në fund të vitit të shkuar Kosova ishte vendi me gjendjen epidemiologjike Covid-19 më të mirën në rajon, situata po ndryshon dukshëm me fillimin e vitit. Instituti Kombëtar i Shëndetësisë Publike, tha këtë të hënë se situata epidemiologjike në Kosovë mund të përkeqësohet si pasojë e përhapjes së variantit Omicron të koronavirusit. Numri i të infektuarve ishte 1-shifror në fund të vitit të shkuar, por aktualisht brenda dite po regjistrohen qindra raste me Covid-19.
Vetëm në 24 orët e fundit ishin 304 raste. Instituti bën thirrje për respektim të masave dhe të mos ketë grumbullime të njerëzve.
Ndryshe nga viti i kaluar, Kosova nuk përballet me mungesë të vaksinave dhe sipas të dhënave të Ministrisë së Shëndetësisë në Kosovë, 49.2 % e qytetarëve janë vaksinuar me dozën e parë të vaksinës, ndërsa 43.9 % me dozën e dytë. Ministria e Shëndetësisë bënë të ditur se vaksina ka mjaftueshëm dhe mbi 400 mijë të tilla aktualisht janë në dispozicion, ndërsa, sipas nevojës mund të kontraktohen të tjera. Kosova nisi fushatën e vaksinimit kundër koronavirusit në fund të marsit të vitit 2021, ndërkaq nga fillimi i dhjetorit të vitit të shkuar, ka nisur edhe me dozën e tretë përforcuese. Nga 09.12.- 01.01. të këtij viti. 2,093 qytetarë kanë marrë dozën e tretë.
Edhe në Kosovë të drejtë vaksinimi kanë të gjithë personat mbi 12 vjeç, por numri i të vaksinuarve nën moshën 18-vjeçare konsiderohet të jetë shumë i ulët. Sipas Agjencisë së Statistikave të Kosovës, numri i fëmijëve nga 12 deri 15 vjeç në Kosovë, është afro 100 mijë. Materiale informuese për vaksinimin e fëmijëve tashmë janë shpërndarë nëpër shkolla dhe sipas njoftimit të Ministrisë së Shëndetësisë, do të vazhdohet me fushata sensibilizuese për vaksinën kundër koronavirusit. DW
E . S / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.