Kosto e emigracionit, FMN: Sot, rajoni do të kishte një ekonomi 7% më të lartë
“Gjatë 25 viteve të fundit, 20 milionë banorë janë larguar nga vendet e Europës juglindore, ose 5.5% e popullsisë së përgjithshme. Në rast se kjo nuk do të kishte ndodhur, atëherë, që prej vitit 2012, ekonomia e rajonit do të ishte mesatarisht 7% më e lartë se ç`është sot”, deklaroi Poul Mathias Thomsen, drejtor i Fondit Monetar Ndërkombëtar për Europën.
Këto deklarata u bënë gjatë konferencës së nivelit të lartë “Ripërshpejtimi i konvergjencës në Evropën Qendrore, Lindore dhe Juglindore – roli i qeverisjes dhe institucioneve”, organizuar nga Banka Kombëtare e Kroacisë dhe Fondi Monetar Ndërkombëtar në Dubrovnik, ku i pranishëm ishte edhe Guvernatori i Bankës Qendrore të Shqipërisë, Gent Sejko.
Thomsen e vuri theksin pikërisht te sfidat demografike me të cilat po përballet rajoni.
“Këto probleme dhe mungesa e forcës punëtore të kualifikuar do të jenë një sfidë mjaft serioze. Përveç Turqisë, i gjithë rajoni po plaket shumë shpejt”, shtoi ai.
Fondi Monetar Ndërkombëtar i bëri apel vendeve të rajonit që të përshpejtojnë procesin e integrimin në Bashkimin Europian.
“Liderët e Europës kanë dhënë garanci se dyert e unionit do të mbeten të hapura për ju. Por, mendimi im është se, shumë prej liderëve të rajonit po e vënë në dyshim këtë garanci”, deklaroi drejtori i FMN për Europën.
Ai kritikoi edhe faktin se, rajoni i Europës juglindore po bëhet gjithmonë e më shumë heterogjen, ku në disa vende funksionon ekonomia e tregut e në disa të tjerë ajo e planifikuar dhe centralizuar.
E pranishme në këtë konferencë ishte edhe numri një i FMN, Christine Lagarde, e cila deklaroi se, në shumë mënyra, rajoni ka qenë një histori suksesi.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.