Kosto e një leje ndërtimi – 18 procedura, nga të cilat 10 prej tyre vijnë me “gjobë”

Raporti i fundit i Doing Business nxori në pah një anë të errët të të bërit biznes në Shqipëri; lejet e ndërtimit. Procedurat për të marrë një leje ndërtimi në vendin tonë janë vështirësuar ndjeshëm, me kohën për të marrë një leje në rritje nga një vit më parë, në 299 ditë, nga 220 që ishte.

Një rritje të ndjeshme ka pësuar edhe kosto e ndërtimit. Ky është një ndër aspektet më të rëndësishme të të bërit biznes, sidomos për sipërmarrësit e huaj, që kanë një potencial të madh investimi dhe njohuri të pakta të mënyrës së funksionimit të gjërave në Shqipëri.

Banka Botërore në raportin dedikuar vetëm Shqipërisë për të bërit biznes sqaron me detaje situatën në vendin tonë në këtë drejtim, duke analizuar secilën prej 18 procedurave që duhet ndjekur për t`u pajisur me një ndërtimi të rregullt, që nga fillimi e deri në regjistrimin e pronës.

Si kohëzgjatja e marrjes së një leje, ashtu edhe kosto e ndërtimit janë bindshëm mbi mesataren europiane dhe të Azisë qendrore, saktëson Banka Botërore. Shqipëria është më mirë se mesatarja e rajonit vetëm në drejtim të cilësisë së ndërtimit.

Të gjitha përllogaritjet e Bankës Botërore janë bërë për një ndërtesë 1300 metra katrorë, me një vlerë ndërtimi prej 27 milionë lekësh, pra një ndërtesë tipike biznesi të mesëm.

Nga 18 procedurat, 10 prej tyre janë me pagesë, dhe në total përkthehen në të paktën 299 ditë pritje.

Marrja e certifikatës së pronësisë kushton 3250 lekë, ajo e studimit gjeoteknik 75 mijë lekë, opinioni i departamentit të planifikimit urban 2000 lekë, leja nga autoritet ujore 3000 lekë, ajo e agjencisë së ambientit dhe leja zhvillimore nga departamenti i mbrojtjes nga zjarri nga 10 mijë lekë secila, lidhja e kontratës së ujit së bashku me shërbimin, 40 mijë lekë, regjistrimi i pronës 43 mijë lekë, leje zhvillimore 13 mijë lekë, dhe kërkesa për leje ndërtimi 1.36 milionë lekë.

Këto dy të fundit janë në varësi të vlerës së pronës. Një pjesë e madhe e këtyre taksave janë të vlefshme vetëm për ndërtesa mbi 250 metra katrorë. Pra, në total, një biznesmen i tillë, përveçse duhet të presë 299 ditë vetëm për procedurat e ndërtimit, duhet të shpenzojë edhe një shifër në rreth 1.55 milionë lekë.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.