Kosto e zgjidhjes së një kontrate – 35% e vlerës së kërkuar, avokatët shqiptarë janë më të paguarit në rajon
Të zgjidhësh një kontratë mes palëve në Shqipëri, kërkon mjaft kohë, por edhe para. Të dhënat e Bankës Botërore për të bërit biznes, tregojnë se, duhen plot 525 ditë për të arritur në zgjidhjen e një kontrate nëpërmjet ndërmjetësimit. Në Europë dhe vendet e Azisë Qendrore kjo kohë është disi më e ulët, në 496 ditë. Por, ajo që shqetëson më shumë, veç kohës, duket se është kosto. Kushdo që ngre një padi civile dhe kërkon një dëmshpërblim në vlerë monetare do të duhet të lërë rrugës rreth 35% të kësaj shumë, ose mesatarisht 34.9%, thotë Banka Botërore. Kjo normë është ndjeshëm mbi mesataren europiane që fiksohet në 26%, ndërsa mesatarja e vendeve me të ardhura të larta të OECD fiksohet në 21%.
Në krahasim me vendet e tjera të rajonit ndërkohë, vetëm Serbia duket se ka një normë më të kartë, në 40.8%. Kjo duket se ka një shakatar të dukshëm, kosto mjaft të larta për avokatët. Mesatarisht, ky i fundit do të kërkojë 25% të vlerës për të cilën është ngritur padia, pra ¼ e saj, që është edhe një ndër normat më të larta në Europë. Në krahasim me vendet e tjera të rajonit, vetëm në Kosovë avokatët kërkojnë më shumë para, 25.2% të vlerës së kontratës mesatarisht.
Kosto e zgjidhjes së një kontrate civile në vendin tonë, prej 35%, ndahet kështu: 25% për avokatët, 5.7% si tarifë gjyqësore, dhe 4.2% si tarifë për zbatimin. Ky është edhe një ndër proceset më të vështira në vendin tonë, një dhembje koke për shumëkënd, punëmarrës, punëdhënës, biznesmen apo klientë qoftë. Banka Botërore ndërkohë, e merr parasysh edhe këtë, pasi në nën-indikatorin që mat cilësinë e procesit të zgjidhjes së kontratës, na jep 7.5 pikë nga 18 në total, duke na renditur padiskutim të fundit në rajon, por edhe më gjerë.
Zgjidhja e një kontrate e më pas zbatimi i vendimit është një ndër aspektet më të rëndësishme të të bërit biznes në një vend, dhe Shqipëria nuk del aspak faqebardhë në këtë drejtim. Personi paditës, veç 525 ditëve, duhet të shpenzojë edhe 35% të vlerës së parave që kërkon për të fituar të drejtën e tij, pa marrë parasysh paratë nën dorë, që në Shqipëri janë një fenomen mjaft i përhapur.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.