Kostot për të sëmurët me kancer/Manastirliu: Kemi rritur buxhetin. Kosova: Menaxhojeni si duhet

Buxheti dhe financimet në shëndetësi e konkretisht buxheti për të sëmurët me kancer ka shkaktuar debate mes ministres së Shëndetësisë dhe deputetëve të opozitës.

Gjatë Komisionit për Çështjet Sociale dhe Shëndetësinë është diskutuar për rastet e reja të kancerit të gjirit që numërohen në 550 të tilla në vit, si dhe për trajtimin e tyre me medikamentet e caktuara.

Ministrja e Shëndetësisë Ogreta Manastirliu është ndalur në rritjen e buxhetit për ketë kategori me 131 milionë lekë. Sipas Deputetit të opozitës Halim Kosova duhet që pavarësisht rritjes së buxhetit të ketë rritje të menaxhimit të tij.

Por pavarësisht rritjes së buxhetit ndër vite, ngrihen pikëpyetja sa i përket mbulimit të nevojave që ka popullata me shërbimet shëndetësore.

Gjatë diskutimit në Komisionin Parlamentar Ministrja Manastirliu dha edhe një lajmë të mirë, që ka të bëjë me hartimin e paketës së radioterapisë falas ose të trajtimit me rreze që do t’ju bëhet pacientëve edhe në spitalet private, por që do të mbulohet nga Fond i Sigurimit  të Detyrueshëm të Kujdesit Shëndetësorë.

Ndërkohë që në listën e barnave të rimbursueshëm do të përfshihen edhe 5 barna të reja për trajtimin e kancerit të gjirit. Sa i përket listës së rimbursimit të medikamenteve edhe pse kanë mbetur vetëm tre muaj që të mbyllet viti 2017, përdoret lista e rimbursimit të medikamenteve e vitit 2016.

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.