Krahasimi me rajonin – Çmimi i energjisë, sa paguan biznesi dhe familjarët
Biznesi dhe familjet janë gjithmonë të ndjeshme sa herë që flitet për çmimin e energjisë. Varësia nga situata hidrike, të paktën për Shqipërinë rrit pasigurinë, por viti 2016 ashtu sikurse u mbyll me bilanc pozitiv për operatorët, ka rezultuar pozitiv edhe për konsumatorët. Kuptohet jo për të gjithë.
Enti Rregullator i Energjisë ka bërë një krahasim të tarifës së energjisë për konsumatorët familjarë gjatë vitit 2016 duke e parë këtë në raport me rajonin. Këtu lajmi është i mirë.
Shqipëria rezulton me një çmim mesatar prej 7 cent/kwh pak a shumë i njëjti nivel që ka Maqedonia, ndërkohë që Bosnjë Hercegovina vjen e treta në listë me 7.3 cent kurse Bullgaria 7.7 cent. Rekordin e mban Kroacia me 10.7 cent për kilovat/orë.
Por nga ana tjetër biznesi shqiptar nuk duhet të jetë dhe aq i kënaqur kur sheh se mesatarja e çmimit të energjisë për të është më lart se bizneset e rajonit. Çmimi i energjisë sipas llogaritjes së Entit Rregullator rezulton në 9.8 eurocent e njëjtë me Turqinë, por më lart sesa Bullgaria me rreth 9 cent, Bosnjë Hercegovina 6.6 euro cent për kilovat orë.
Sigurisht vende të tjera si Kroacia apo Maqedonia kanë paguar më shtrenjt se ne.
“Çmimi mesatar për klientët fundorë për vitin 2016 rezultoi 11,19 lekë/kwh kundrejt atij të rezultuar për vitin 2015 prej 11.22 lekë/kwh, për shkak të realizimit të një strukture të ndryshme nga ai i parashikuar”, vlerëson ERE.
Nertila Maho/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.