Kredi e re me Fondin Saudit për Zhvillim – Pas tërheqjes nga huaja 30 milion USD, projekt për rehabilitim e ndërtim objektesh në Vlorë-Orikum
Pak muaj pas tërheqjes nga kredia 30 mln USD, që do të përdorej për rehabilimit e rrugës së Lumit të Vlorës, qeveria shqiptare i ka hapur rrugën nënshkrimit të një tjetër marrëveshje huaje me Fondin Saudit për Zhvillim. Projektligji ka marrë dakordësinë në mbledhjen e datës 2 qershor në qeveri, ndërkohë që parashikohet që kredia të shkojë për projektin e rehabilitimit dhe ndërtimit të objekteve në afërsi të rrugës bregdetare Vlorë-Orikum.
Në vendim nuk përcaktohet shuma e kredisë, por saktësohet se Kuvendi do të duhet ta shqyrtojë dhe miratojë me procedurë të përshpejtuar projektligjin e propozuar. Në datën 17 shtator të vitit të kaluar, Kuvendi miratoi tërheqjen nga një kredi prej 30 mln euro me Fondit Saudit për Zhvillim për një projekt, që parashikonte ndërtimin e rrugës që fillonte nga bypass-i i Vlorës, Ura e Pëshkëpisë, Ura e Laskos deri në Qeparo si dhe ndërtimin e degëzimit Ura e Peshkëpisë-Selenicë-superstrada Levan- Tepelenë. Gjatë diskutimeve për tërheqjen nga kjo kredi, deputeti i Partisë Socialiste, Vullnet Sinaj reagoi ashpër, duke thënë se është harruar fakti se aksi që nuk do të ndërtohej përfshinte një zonë tejet të rëndësishme edhe nga pikëpamja industriale. Ndërkaq, deputeti i opozitës Artur Roshi tha në atë kohë se tërheqja nga kredia 30 mln usd bëhej për motive politike.
Në kohën e nënshkrimit të marrëveshjes për rehabilitimin e rrugës së Lumit të Vlorës, realizimi i këtij projekti shihej si shumë i rëndësishëm për zhvillimin e qëndrueshëm social-ekonomik në nivel rajonal e vendor.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.