Kredi me garanci te BERZH/ Detajet e borxhit 70 mln euro të OSHEE

Operatori i Sistemit të Shpërndarjes së Energjisë Elektrike do të marrë një kredi 70 milionë euro te Banka  Evropiane  për  Rindërtim  dhe  Zhvillim  (BERZH). Marrëveshja e huasë dhe marrëveshja e garancisë, janë nënshkruar me  BERZH-n në fillim të muajit shtator dhe kanë si qëllim sigurimin e fondeve në formën e kredisë me terma të favorshëm, për të mbështetur kompaninë për sigurimin e stabilitetit ekonomiko – financiar. Kredia ka një afat shlyerje 5 vite.

Në këtë marrëveshje huaje, shteti shqiptar ka rolin e garantit, çka nënkupton se nëse OSHEE nuk do të ketë mundësi të shlyejë kredinë, atëhere detyrimet e kredisë do të paguhen nga buxheti i shtetit.

“Shoqëria  OSHEE  gjatë  vitit  2020  është  përballur  jo  vetëm  me  situatën  e thatësirës së jashtëzakonshme, por kësaj situate iu shtua dhe situata e Covid-19, e cila pati efekte shtesë negative në financat e OSHEE Group, sh.a.-së, duke e përballur shoqërinë me një situatë të paimagjinueshme më parë. OSHEE  Group,  sh.a.-ja,  ka  marrë  menjëherë  masa  të  jashtëzakonshme  për përballimin  e  situatës,  duke  pezulluar  totalisht  planin  e  investimeve  për  vitin 2020.

Por këto masa zgjidhin situatën momentale të OSHEE-së për tejkalimin e situatës,  por  dhanë  pasoja  të  rënda  në  stabilitetin  teknik  e  financiar,  si  dhe arritjes së treguesve të saj, bazuar në planin e konsolidimit financiar të sektorit.

Nëpërmjet këtij financimi, OSHEE-ja jo vetëm siguron sa më sipër, por garanton  që  do  ta  përballojë  me  sukses  ripagimin  e  kësaj  kredie  me  fondet  e aktivitetit të saj” shkruhet në relacionin e marrëveshjes së depozituar në Kuvend.

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.