Kredia dhe karta për studentët – Vonesa e miratimit të VKM, rëndon financat e familjeve
Edhe pse mbi 71% të akteve nënligjore të ligjit të ri për arsimin e lartë janë miratuar, tashmë 2 vite pas hyrjes në fuqi të ligjit, ende ngelet disa vendime të rendësishme, vonesa e të cilave ndikon në gjendjen ekonomike të familjeve të cilët kanë fëmijë që ndjekin studimet në fakultetet e arsimit të lartë në vend.
Vonesa e e VKM për ndihmën me kredi e studentëve apo edhe ajo për kartën e studentit, kanë bërë që shumë shpenzime për studime të mbulohen nga vetë këta të fundit edhe pse qeveria ka premtuar lehtësira financiare në shumë fusha për studentët që mund t’i përfitonin nga karta.
Vetëm pak ditë më parë deputeti i LSI, Shezai Rrokaj i ka kërkuar Ministres Nikolla në komisionin e edukimit dhe mjeteve të informimit publik më shumë buxhet për arsimin, i cili për 2018-ën zë vetëm 3% të prodhimit të brendshëm Bruto. Rrokaj e ka vlerësuar si të pamjaftueshëm dhe shumë të ulët krahasuar me vendet e rajonit.
Sipas deputetit të LSI, buxhetimi për sektorin e Arsimit duhet të arrinte në vlerën prej 5% të prodhimit të brendshëm bruto nga të cilat 3% për sistemin parauniversitar dhe 2% për arsimin pasuniversitar.
Vetëm 2 ditë më parë ministrja e Arsimit Lindita Nikolla bëri me dije se po punohet për përfundimin e të gjitha akteve nënligjore ndërkohë që brenda muajit shkurt pritet edhe miratimi i vendimit për gradat dhe titujt akademik si edhe tarifat për shërbimet nga qendrat e shërbimit arsimor.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.