Kredia “ikën” nga Tirana – Më pak kredi në kryeqytet, më shumë në qarqet e tjerë

Gjatë këtij viti kredia në Tiranë ka rënë ndjeshëm, ndërsa në shumicën e qarqeve të tjera të Shqipërisë është rritur lehtë. Sipas të dhënave nga Banka e Shqipërisë, kredia në qarkun e Tiranës në fund të muajit qershor kishte vlerën e rreth 395 miliardë lekëve, afro 12 miliardë lekë më pak krahasuar me fundin e vitit 2017.

Rënia e kredisë në Tiranë lidhet edhe me strukturën e kredisë. Bizneset dhe sidomos ato më të mëdha janë të përqendruara kryesisht në këtë qark dhe kjo sjell edhe një luhatshmëri më të lartë të portofolit të kredisë.

Tirana dominon ndjeshëm kreditimin e ekonomisë, me 73% të portofolit total. Megjithatë në gjysmën e parë të këtij viti vërehet një rritje e kredisë në qarqet e tjerë të vendit.

Nëse përjashtojmë Tiranën, për qarqet e tjera të Shqipërisë kredia në gjashtëmujorin e parë të vitit është rritur me 2.4% krahasuar me fundin e vitit të kaluar. Rritja më e lartë është regjistruar në qarkun e Durrësit, ku vlera e portofolit të kredisë ka arritur në afro 40 miliardë lekë, me një rritje prej rreth tre miliardë lekësh në gjashtë muajt e parë të vitit. Rritje, në përmasa më të kufizuara, kredia ka regjistruar edhe në qarqet e Elbasanit, Fierit dhe Korçës.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.