Kredia jashtë vendit – Ra me 36%, bankat japin më shumë hua në Shqipëri
Kredia e sistemit bankar jashtë vendit po bie me ritme të shpejta. Mbështetur në të dhënat e Bankës së Shqipërisë, në fund të muajit korrik portofoli i kredisë për jorezidentët kishte vlerën e 42.2 miliardë lekëve. Vlera e saj ka rënë me 36% krahasuar me një vit më parë dhe me 23% që nga fillimi i vitit.
Kredia jashtë vendit njohu një cikël rritjeje të shpejtë, pas vitit 2015, ndonëse kjo rritje ishte e përqendruar te një numër i kufizuar bankash dhe në tregje të veçanta. Kjo u ndikua nga kërkesa e dobët për kredi në tregun e brendshëm, nga potencialet më të mëdha që paraqisnin tregjet fqinje, por edhe nga një rritje e ndjeshme e depozitave në valutë.
Ndikim të konsiderueshëm në zgjerimin e kredisë jorezidente dha sidomos rritja e degës së Bankës Kombëtare Tregtare në Kosovë. Në pikun e saj, kredia jorezidente arriti në mbi 10% të portofolit të kredisë për ekonominë. Kjo e shtyu Bankën e Shqipërisë të kërkonte një qasje më të kujdesshme nga bankat në këtë segment të aktivitetit, që potencialisht mund të sillte rreziqe më të larta, për shkak të vështirësisë për të ndjekur aktivitetin e huamarrësit, por edhe për faktin që këto kompani veprojnë në juridiksione të ndryshme dhe kjo mund të krijonte probleme, në rast se do të paraqitej nevoja për mbledhje të kredive në rrugë ligjore.
Duke filluar nga viti 2018, bankat e kanë ulur ndjeshëm kreditimin jashtë vendit, për shkak të problematikave të mësipërme, por, edhe sepse ambienti i huadhënies në Shqipëri paraqitet më i përmirësuar. Raporti i kredive me probleme ka rënë në kufijtë e 11%, ndërsa portofoli i kredisë për ekonominë shqiptare tashmë po rritet me pothuajse 5%, me bazë vjetore.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.