Kredia “kërcen” për marsin – Në rritje për të tretin muaj radhazi
Kredia u rrit për të tretin muaj radhazi gjatë marsit, duke konfirmuar nisjen pozitive të këtij viti kalendarik. Mbështetur në statistikat e Bankës së Shqipërisë, portofoli i kredisë arriti në 547 miliardë lekë dhe u rrit me afërsisht gjashtë miliardë lekë gjatë marsit. Ndërkohë, që nga fillimi i vitit, kredia për ekonominë është rritur me 14 miliardë lekë ose rreth 115 milionë euro.
Për marsin, u vërejt rritje e njëkohshme e kredisë në të gjitha segmentet kryesore të tregut, përfshi kompanitë publike, ato private, korporatat financiare dhe individët. Rritja e shpërndarë në të gjitha segmentet mund të jetë dëshmi për një shëndoshje gjithëpërfshirëse të tregut të huasë. Sidoqoftë, të paktën në huadhënien për kompanitë publike, rritja mund të jetë ndikuar edhe nga faktorë të përkohshëm, si nevoja për të importuar energji elektrike. Sidoqoftë, ky segment zë një peshë relativisht të ulët kundrejt totalit të kredisë për ekonominë, me më pak se 4% të totalit.
Burimi: Banka e Shqipërisë
Huadhënia për sektorin privat, si në segmentin e bizneseve, ashtu dhe në atë të individëve ka një prirje të qëndrueshme në rritje për të gjithë tremujorin e parë. Për individët kjo nuk është risi, sepse në vitet e fundit tendenca ka qenë pozitive. Zhvillimet inkurajuese lidhen sidomos me bizneset private, që përbëjnë edhe segmentin më të rëndësishëm në tregun e kredisë. Pas vitesh të tëra në rënie vjetore, në fund të muajit mars ky hendek më në fund u mbyll dhe huaja për biznesin rezultoi më e lartë krahasuar me një vit më parë.
Tkurrja për vite me radhë e kredisë për biznesin ishte rezultat i një sërë faktorësh, që nga kontraktimi i kërkesës dhe ofertës për kredi dhe deri tek procesi i pastrimit të kredive të humbura nga bilancet. Në katër vjet, bankat kanë fshirë rreth 450 milionë euro kredi të humbura, që në pjesën dërrmuese i takonin bizneseve. Nga ana tjetër, ky proces ka ndihmuar në uljen e raportit të kredive me probleme pranë nivelit më të ulët të dekadës së fundit, duke i dhënë frymëmarrje huadhënies së re.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.