Kredia konsumatore – Bankat japin 28 milionë euro në dy muaj

Kredia konsumatore ka arritur vlerën e rreth 28 milionë eurove vetëm për dy muajt e parë të vitit. Sipas të dhënave nga Banka e Shqipërisë, sistemi bankar ka disbursuar në mbështetje të konsumit nga familjet në 3.6 miliardë lekë kredi të reja, rreth 6% më shumë krahasuar me të njëjtën periudhë të një viti më parë.

Nëse llogarisim edhe overdraftet e reja të hapura në dy muajt e parë të vitit, shuma në dispozicion të konsumit të familjeve ishte rreth 4.2 miliardë lekë ose 32 milionë euro.

Në vitet e fundit, bankat e kanë çliruar ndjeshëm ofertën në kredinë për individë, me qëllim një shpërndarje më të mirë të rrezikut në një portofol që historikisht është dominuar në masë të madhe nga kredia për biznesin.

Rritja e kredisë konsumatore është favorizuar edhe nga ulja drastike e normave të interesit, që falë kursit të politikës monetare stimuluese kanë prekur vlerat më të ulëta historike. Për shembull, në shkurt të këtij viti interesi mesatar i kredive të reja konsumatore në lekë ishte më pak se 8%.

Gjithashtu, bankat dhe institucionet e tjera financiare po përdorin gjithnjë e më shumë produktet e huasë për të tretë, përmes të cilave klientët e interesuar mund të blejnë me kredi në pikat e shitjes së produkteve elektronike, të pajisjeve elektroshtëpiake apo edhe për blerje të tjera në vlera të mëdha.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.