Kredia për biznesin – Ra në 23.4% të PBB-së në mesin e këtij viti
Kreditimi i biznesit në terma realë pësoi rënie të ndjeshme në tremujorin e dytë të këtij viti.
Sipas Bankës së Shqipërisë, raporti i kredisë për biznese ndaj Prodhimit të Brendshëm Bruto zbriti në 23.4% në tremujorin e dytë të vitit 2018, ose 0.8 pikë përqindje më pak se në tremujorin e parë.
Rënia i këtij raporti konfirmon ecurinë e dobët dhe të luhatshme të kredisë për biznese.
Dobësia e aktivitetit kreditues për biznese vazhdon të reflektojë politikat shtrënguese të bankave, për biznesin e madh, siç kanë treguar vrojtimet e aktivitetit kreditues në vitet e fundit.
Nga ana tjetër, edhe rritje e kërkesës së bizneseve për financim nga bankat është e ngadaltë. Në tremujorin e dytë, kjo është ndikuar edhe nga përmirësimi i gjendjes së likuiditetit të tyre.
Kjo vihet re edhe nga rritja e depozitave të bizneseve në banka, që gjatë tremujorit të dytë janë rritur me 7 miliardë lekë. Zhvillimet në tremujorin e dytë konfirmojnë preferencën e bizneseve për kreditimin në valutë, e lidhur kjo edhe me sektorin ku vepron biznesi.
Shpërndarja e kredisë sipas sektorëve të ekonomisë tregon se bankat kanë rritur financimin për bizneset që veprojnë në sektorin e tregtisë, hoteleve dhe restoranteve, dhe më pak në sektorin e ndërtimit.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.