Kredia për ekonominë – 6 mujori i parë mbyllet me rënie
Kredia për ekonominë rezultoi në rënie për gjashtëmujorin e parë të këtij viti. Sipas statistikave të Bankës së Shqipërisë, në fund të qershorit portofoli total i kredisë zbriti në vlerën e 543.5 miliardë lekëve, me një rënie të mëtejshme prej afro 1 miliardë lekësh krahasuar me majin.
Vlera e kredisë është 1.6% më e ulët krahasuar me të njëjtën periudhë të një viti më parë. Prej disa muajsh, Banka e Shqipërisë po shprehet optimiste për ritmet e kreditimit dhe, në fakt, vlera e raportuar e kredive të reja këtë vit është më e lartë. Vetëm për qershorin, kredia e re ishte 26 miliardë lekë, pesë miliardë lekë më shumë krahasuar me qershorin e vitit të kaluar.
Por, fakti që vlera totale e portofolit vazhdon të bjerë, tregon se ndoshta një pjesë e madhe e kredive të reja në fakt janë rinovime të overdrafteve nga bizneset apo ristrukturime të kredive ekzistuese. Sasia totale e huasë që përdoret nga sektori privat i ekonomisë nuk po rritet dhe segmenti më problematik ngelet biznesi, ku kredia vijon të jetë në rënie. Më pozitive është gjendja në segmentin e individëve, që shfaqet më i qëndrueshëm dhe në rritje të vazhdueshme në kohë.
Kjo i detyrohet një peshe të lartë të kredive afatgjata për blerje të pasurive të paluajtshme, por edhe një efekti më të ulët nga fshirja e kredive të humbura, fenomen që ka gërryer ndjeshëm portofolin e kredisë për bizneset në vitet e fundit. Shpërndarja më e mirë e rrezikut si dhe stabiliteti më i lartë janë faktorë që po i shtyjnë bankat të fokusohen shumë më tepër te kreditimi i individëve gjatë viteve të fundit.
Sidoqoftë, një faktor me ndikim të konsiderueshëm në ritmet e kreditimit gjatë gjysmës së parë të vitit mund të kenë qenë edhe zgjedhjet e përgjithshme. Periudhat parazgjedhore historikisht janë karakterizuar nga një sjellje hezituese e bizneseve në ndërmarrjen e investimeve të reja.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.