Kredia për ekonominë, Credins Bank raporton rritje edhe për tremujorin e parë të 2020
Credins Bank ka vijuar rritjen e kreditimit edhe në tremujorin e parë të këtij viti. Sipas të dhënave periodike financiare, të paaudituara, të publikuara nga vetë banka, në fund të marsit portofoli i kredisë, në terma neto, ka arritur vlerën e 108.2 miliardë lekëve. Krahasuar me të njëjtën periudhë të vitit të kaluar, portofoli i kredisë është rritur me 10%. Ashtu si për gjithë sistemin bankar, një pjesë e rritjes ka ardhur edhe nga mbiçmimi i përkohshëm të euros në kursin e këmbimit me lekun, në fund të muajit mars. Kjo ka rritur vlerën e portofolit në valutë, të konvertuar në lekë për qëllime raportimi.
Gjithashtu, banka raporton një përmirësim të ndjeshëm të cilësisë së kredisë. Huatë me vonesë, në vlerë, janë pakësuar me pothuajse 29% krahasuar me marsin e vitit të kaluar.
Në tërësi, banka ka vijuar rritjen dhe totali i aktiveve është zgjeruar me 16% me bazë vjetore. Credins Bank është aktualisht banka e tretë më e madhe në vend.
Rritja e depozitave të publikut ngelet mbështetja kryesore për rritjen e Credins Bank. Në fund të marsit, totali i depozitave arriti vlerën e 203 miliardë lekëve, 17% më shumë krahasuar me një vit më parë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.