Kredia për individë – Bankat lehtësojnë përsëri kushtet në tremujorin e tretë
Bankat raportuan lehtësim të mëtejshëm të standardeve të kredisë për individët në tremujorin e tretë të vitit. Sipas vrojtimit të aktivitetit kreditues të bankës së Shqipërisë, standardet e kredisë rezultuan të lehtësuara, si në segmentin e kredisë për blerje banesash, ashtu edhe për kredinë konsumatore.
Si mjet kryesor për lehtësimin e kushteve të kreditimit për individët, bankat kanë përdorur ngushtimin e marzhit mesatar të interesit, si edhe zbutjen e kërkesave për kolateral.
Kreditimi i individëve vazhdon të ketë një ecuri pozitive edhe, sipas statistikave të Bankës Qendrore, gjatë periudhës korrik-gusht u zgjerua me afro katër miliardë lekë. Sipas bankave, zgjerimi i kërkesës për kredi nga individët është mbështetur kryesisht nga kërkesa për kredi hipotekare.
Bankat po shfaqin vëmendje të zgjeruar gjatë viteve të fundit për të rritur kreditimin e individëve. Ky segment ka parametra cilësorë më të mirë, me një raport të kredive me probleme sa gjysma e segmentit të bizneseve.
Bankat raportuan një shtrëngim të mëtejshëm të standardeve të kredisë për bizneset edhe në tremujorin e tretë, sidomos për biznesin e madh. Standardet e kreditimit janë shtrënguar nëpërmjet rritjes së kërkesave për kolateral, uljes së madhësisë së kredisë, si edhe marzheve më të larta për kreditë me rrezik.
Pavarësisht nga përgjigjet e bankave në anketim, shifrat tregojnë se kreditimi i biznesit ka pasur një tendencë pozitive në tremujorin e tretë, të paktën për muajt korrik dhe gusht. Sipas të dhënave nga Banka e Shqipërisë, interesi mesatar i kredive në lekë në muajt e verës ka rënë gradualisht deri në nivelin 6.97%.
Gjatë gushtit, kredia për biznesin regjistroi edhe një rritje sasiore me rreth 2.3 miliardë lekë. Kërkesa për kredi është rritur si për ndërmarrjet e mëdha, ashtu edhe për ato të vogla dhe të mesme.
Sipas bankave, bizneset kanë shfaqur kërkesë më të lartë njëkohësisht për kredinë për kapital qarkullues dhe për kredinë për investime.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.