Kredia për individë/ Bankat raportojnë lehtësim të mëtejshëm
Banka raportuan lehtësim të mëtejshëm të standardeve të kreditimit për individët në tremujorin e dytë të këtij viti. Sipas vrojtimit të aktivitetit kreditues, nga Banka e Shqipërisë, lehtësimi i standardeve u vërejt si në kreditë për blerje banese, ashtu edhe në ato konsumatore. Bankat u shprehën se ky lehtësim pasojë e trysnisë së shtuar nga konkurrenca në sistem.
Kushtet e kreditimit u lehtësuan kryesisht përmes aplikimit të marzheve më të ulëta të interesit mbi kreditë. Gjithashtu, kushtet e tjera joçmim u raportuan më të lehtësuara, si pasojë e kërkesave më të ulëta për kolateral, shtimit të madhësisë së kredisë dhe zgjatjes së maturitetit të saj.
Edhe kërkesa e individëve për kredi u perceptua disi më e lartë në tremujorin e dytë të vitit, sidomos në segmentin e huasë me qëllim blerjen e banesave. Në kahun rritës të kërkesës për kredi nga ana e individëve, sipas gjykimit të bankave, ndikuan nevojat më të larta në financim, si në blerjen e shtëpive, ashtu edhe për konsum.
Lehtësimi i standardeve të kreditimit për individët pritet të vijojë edhe në tremujorin e tretë të vitit, fokusuar kryesisht në segmentin e kredive për blerje banesash. Bazuar në opinionin e bankave, edhe kërkesa për kredi e individëve pritet të jetë më e lartë në tremujorin e tretë të vitit 2019, e nxitur nga nevoja më e lartë për financim si të konsumit, ashtu edhe të blerjes së banesave.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.