Kredia për individët, bankat ulin më tej interesat

Kreditimi i individëve është gjithnjë e më shumë në fokus të sistemit bankar. Sipas vrojtimit të aktivitetit kreditues për tremujori e parë të vitit, kryer nga Banka e Shqipërisë, bankat kanë deklaruar një çlirim të mëtejshëm të standardeve të kreditimit për individët.

Standardet u lehtësuan si për kreditë konsumatore, ashtu edhe për kreditë për blerje banese, ndonëse këto të fundit në një masë më të vogël. Instrumenti kryesor lehtësues që po aplikohet nga bankat është ulja e normave të interesit, që, veçanërisht për kreditimin e individëve, ndodhen në nivelet më të ulëta historike.

Lehtësimi i mëtejshëm i standardeve të kredisë së dhënë për individët rezulton të ketë ardhur kryesisht nga rritja e konkurrencës në sektorin bankar. Për sa i takon bizneseve, shtrëngimi i standardeve të kreditimit ka vazhduar edhe në tremujorin e parë të këtij viti. Bankat raportojnë shtrëngim sidomos në segmentin e ndërmarrjeve të mëdha.

Standardet e kredisë dhënë bizneseve janë shtrënguar, si për investime ashtu edhe për kapital qarkullues, dhe pritet që të mbeten në të njëjtin kah edhe në tremujorin e ardhshëm.

Faktorët me ndikimin kryesor në shtrëngimin e standardeve mbeten problemet specifike të sektorëve ku vepron biznesi, kreditë me probleme dhe perceptimi i bankave mbi situatën makroekonomike. Kërkesa për kredi në tremujorin e parë të vitit 2017 u raportua në rritje si për bizneset, ashtu edhe për individët.

Rritja e kërkesës së individëve është regjistruar kryesisht për kredi konsumatore, ndërsa për sa i takon kërkesës së bizneseve, ajo ka shfaqur një zgjerim të lehtë, kryesisht nga ndërmarrjet e vogla dhe të mesme.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.